Қашықтан оқу бойынша ақпарат

ҚАШЫҚТАН ОҚЫҒАН ОҚУШЫДА СЕНІМДІЛІК ПАЙДА БОЛАДЫ

Білім беру жүйесіндегі өзгерістер оқушыларға жан –жақты әсер етуде. Оқыту процесіне енгізілген жаңа әдістердің бірі - қашықтан оқыту әдісі. Қашықтан оқу – қолайлы уақытта, кез келген жерде ақпараттық – коммуникациялық технологиялар көмегімен білім алу. Заман талабы сондай.

Оқушылар қашықтан білім беру жүйесіне біршама үйренді. Бұл әдістің пайдасы: мұғалімнің біліктілігін көтереді, оқушының өз бетімен білім алуын қамтамасыз етеді, ата-аналардың жаңа технологияға көзқарасын өзгертеді. Жаңа білім беру әдісі ауылдық жерлердің жылдам интернет желісіне қосылуына қозғау салды. Қашықтан оқыту мүмкіндіктері үкімет тарапынан қолдау тауып жатыр.

Мектептермен қатар қосымша білім беру мекемелерінде үйірме сабақтарды қашықтан оқытудың қиындығы жоқ. Шет тілі үйірмесін қашықтан оқу кезінде оқушы өз бетімен ізденіп-ақ (сөздіктерді пайдаланып, газет- журналдардан мақалалар аударып), жоғары нәтижеге қол жеткізе алады. Ол үшін көп уақытын сөздікпен мәтін аударуға жұмсаған тиімді. Оқу қызықты өткізу үшін арнайы бағдарламалар арқылы кері байланыс орнатып, ойындар құрастыруға болады. Мысалы, бинго, жылдам тест ойындарын арнайы программаға салсаңыз, оқушы өз бетімен орындап, нәтижесін жылдам көре алады. Шет тілі үйірмесін қашықтан оқыту кезінде сабаққа қатысты қысқаметражды киноларды да ескерген жөн. Ол оқушының еркін сөйлеуіне оң әсер етеді.

Өз бетінше тіл үйренген оқушыда сенімділік пайда болып, одан әрі ақпарат алсам деп ынталанады. Ақпарат қызықты болса, ол оны әрі қарай білуге, меңгеруге асығады. Аталмыш үйірмеде тек шет тіліне қатысты материалдар қамтылмайды. Шет тілі үйірмесі арнайы бағытта оқытылып, қосымша ақпараттар айтылады. Қашықтан білім беру жүйесі арқылы шет тілі үйірмесіне қатысқан оқушылар компьютерлік техниканың қыр-сырын еркін, жылдам меңгереді.

Қай оқу жүйесін алсақ та, оқытушы көп күш-жігер, энергия, уақыт жұмсайды. Оқу жоспарын қашықтан оқуға бейімдеп, жаңа білім алу жолдарын іздестіретіні анық. Сонда ғана озық, өзіне сенімді, білімді оқушы қалыптасады.

Пайдаланылған әдебиеттер тізімі

1. Педагогика. Қоянбаев Ж.Б. Алматы., 1999 жыл

2. Болдырев Н.И. Мектептегі тәрбие жұмысының методикасы. Алматы. Мектеп, 1987 жыл.