Қазіргі жастардың сөйлеу тілі

Жастар – қоғамның қозғаушы күші, егеменді еліміздің ертеңі, тәуелсіз мемлекетіміздің тірегі, ділмәр бабаларымыздан, ақылман аналарымыздан берілген киелі сөзіміздің иесі. Ел іргесі бекіп, тіліміздің мәртебесі үстем болып, технологияның қарыштап дамыған шағында бүгінгі өскелең ұрпақтың сөйлеу тілі көңіл көңшітпейді. Жастардың тілінің шұбарланып, қалай болса солай сөйлеуі қатты белең алды десем артық айтқандық емес. Бүгінгі заманауи жастар тілінде қазақ тілінің қалыбына сыймайтын «фразеологизмдер» жетерлік. Тіліміздің шұбарлануы туралы сөз болғанда бірден ойымызға орыс-ағылшын сөздерін қосып сөйлеуі келеді. Бұдан бөлек жастар тіліндегі жаргондар да қазіргі сөйлеу тілімізді бұзып бара жатқанын күнделікті өмірде кездестіріп жүрміз. әбден бұзып, қалай болса солай қолданатындығынан да көруге болады. Мәселен, лақтырып кету, лапша ілу, құлақтан тебу, алдап кету, сындырып кету, бөшке жару сияқты тұрақты тіркестер қазіргі жастар тіліне әбден орнығып, тұрақты тіркестерге айналып барды. Жаһандану заманында ұлттық болмысымызды сақтап қалу үшін ата-бабамыз қалдырған ұлт тіліндегі сөз жауһарларын ұмытпай, керісінше ұлықтауымыз керек. Сөз соңын ақын Қадыр Мырза Әлінің мына өлең шумақтарымен өрнектегім келеді:

Ана тілің біліп қой,

Еркіндігің, теңдігің.

Ана тілің біліп қой,

Мақтанышың, елдігің.

Ана тілің – арың бұл,

Ұятың боп тұр бетте.

Өзге тілдің бәрін біл,

Өз тіліңді құрметте!

Әрбір сөзімізді орынды қолданып, ойы мазмұнды, тыңдаушысын баурап алардай шұрайлы тіліміздің шырайын кетірмейік жас достар. Тіл тазалығын сақтауды әрбір жас буын өзімізден бастайық. Өйткені сөзден құдіретті нәрсе жоқ. Дана халқымызда «адасқанның айыбы жоқ, қайта үйірін тапқан соң» деген нақыл сөз бар. Олай болса, ана тілімізді қадір тұтып, ардақтайық, өз елінде өгейлік көруіне жол бермейік. Ол үшін жоғарыда айтқанымдай әркім өзінен бастағаны абзал. Ана тіліміздің ертеңгі тағдыры сіз бен біздің қолымызда!