Қоғамдық орындағы - мәдениет

Қоғамдық орындағы мәдениет

Қоғамдық орын — бұл адамдар көп жиналатын, яғни ортақ пайдаланылатын нысандар. Ал көпшілік орында өзін-өзі ұстау және әкімшілік енгізген тәртіпке бағыну — бұл мәдениеттің белгісі. Мәдениет, менің көзқарасымша, жаныңдағы адамдарға деген құрмет. Қарапайым тілмен айтқанда, «қасыңдағы адамға кедергі жасамау». Қасыңдағы адамға құрмет көрсету арқылы біз, ең алдымен, өзімізді құрметтейміз. Қоғамдық орындарда өзгелердің жеке шекарасын сыйлау арқылы біз, ең алдымен, өзіміздің тәрбиемізді және өзімізге деген құрметімізді көрсетеміз.

Біз өмір сүріп жатқан ортаның жайлы әрі қауіпсіз болуы үшін қоғамдық мәдениеттің алтын ережелерін сақтауымыз керек. Ең алдымен — дыбыс мәдениеті. Көпшілік ортада ұялы телефон дыбысын ақырын қойып немесе арнайы құлаққаппен тыңдау керек. Келесі ең басты ережелердің бірі — тазалық сақтау. Қоқысты арнайы жәшіктерге тастап, қоршаған ортаны ластамау қажет. Есте сақтайық, қоғамдық орын мен табиғаттың тазалығын сақтау — әрбір азаматтың міндеті.

Қоғамдық орындардағы мәдениет — бұл әрбір адамның ішкі тәрбиесі мен парасатының айнасы. Әрбір азамат қоғамдық орындарда жауапкершілікті сезініп, қарапайым әдептілік қағидаларын сақтаса, айналамыз бұдан да жайлы, қауіпсіз әрі таза бола түсері сөзсіз. Мәдениетті қоғам қалыптастыру — әрқайсымыздың өзімізден басталады.