Қолөнер шеберлерінің фестивалі

Өзің үміт күткен шәкіртің жүзі бал-бұл жанып, білім шыңынан қол бұлғаса, ұстаз жүрек бұлқына соғып, ыстық қан тамыр-тамырыңа қуалап, өн бойыңда сүйіншілеген бір сезімнің атой салатыны рас қой.

Оқушыларды қолөнер шеберлігіне үйрету ежелден келе жатқан дәстүр. Мектепте оқытылатын пәнінің барлығы жас жеткіншектердің болашағы үшін жасалынып жатқан дүниелер.Ол пәндердің әрқайсысының қосар үлесі қыруар.Әсіресе, оқушыларды іскерлікке, шеберлікке баулуда еңбек пәнінің алатын орны бар. Ал, еңбек пәнінен сабақ беретін мұғалім істің иінін білетін, он саусағынан өнері тамған шебер болса, шәкірттердің бағының жанғаны.

Толқын Мұхаметжанқызы- өз бақытын ұстаздық қызметінен тауып, оны отбасының ынтымағымен ұштастыра білген жайсаң жан. Өз ісіне аса үлкен жауапкершілікпен қарайтын, жұмыс десе жанын салатын елгезек, мамандығын жан-жүрегімен сүйетін білімді ұстаз.

28 ақпан күні аудандық Мәдениет үйінде «Нан тағамдары» тақырыбында фестиваль өтті. Фестивальдің мақсаты- әр ұлт өкілдерінің ас атасы-нанның түрлерін таныстырып, оны презентация түрінде қорғады. Фестивальге аудан бойынша 5 мектептің технология пәнінің мұғалімдері мен оқушылары қатысты.Біздің мектептен жетекшілік етіп барған технология пәнінің мұғалімі Толқын Мұхаметжанқызы оқушылардың өз қолдарынан пісірген тағам түрлерін ұсынды. Фестивальге ұн өнімінен жасалған тағам түрлері мол болды.Осыған орай орындар да белгіленді. Біздің мектептен барған 9-сынып оқушылары Жаңбырбай Ажар, Галиахметова Бақытгүл, Болатова Гүлзат жүлделі 3- орынға ие болып, бағалы сыйлықпен марапатталды. Фестиваль концерттік бағдарламамен ұштасты.Жаңалыққа жаны құмар, адамдық болмысы, азаматтық тұлғасы кейінгі жастарға үлгі боларлықтай, қарапайым жүрегі кең, еңбексүйгіш Толқын Мұхаметжанқызы жетекшілік ететін қолөнер шеберлігі, адамгершілік құнды қасиеттері жас ұрпаққа тағылым болсын дегім келеді.

Раушангүл Шарипова

Р.Елебаев атындағы

Құдықағаш орта мектебінің

Бастауыш сынып мұғалімі