Қыс қызығы

Ж. Досмұхамедов атындағы жоғары педагогикалық колледжінің «Дене тәрбиесі және спорт» кафедрасының ұйымдастыруымен қаламыздағы Бөкей мен Жәңгір хан көтерілген тарихи орын Хан тоғайында 1-курс студенттері арасында өткен “Қыс қызықтары” атты спорттық шара өте керемет өтті. Жердің бетін ақ ұлпа қар басып, қуаныш ұялатқан осы бір мезгілде студенттерді таза ауаға шығарып, бір бой жазуға не жетсін. Жарыс ережесінде шаңғымен 1 км 400 м жүгіру бойынша уақыт есебімен, арқан тартыс ойыны және қызықты эстафеталық ойындар өткізілді. Қыздар арсындағы жарыстар командалық есеппен, ал, ер балалар арасындағы жарыстар жекелей есеппен өткізілді. Қызықты эстафета ойындарында «Кім жылдам», «Хоккейшілір», «Епті шаңғышылар» атты сайыстар оздырылды. Балаларымыз бір мезгіл тоғайдағы таза ауада тынығып, бойларын шынықтырды. Шаңғымен жүгіртуден топтық сайыста 1аКШИ-11 тобының қыздары 13 минут 27 секундта келіп 1-орын алса, ал ұлдар арасындағы жекелей жарыста 1аКШИ-11 тобының студенті Даниял Хансұлтан 9 минут 32 секундта оза шауып, алдына жан салмады. Эстафеталық ойындарды бастаған топ басшылары алғашқы ұпайларды өз командасының қоржынына салды. Студенттермен бірге жанкүйерлік танытып, қолдау көрсете білген кураторлар қатары да баршылық болды. Соның ішінде ерекше атауға тұрарлық кураторлар Ж. Ж. Хамза, А. К. Жумагазиева, Н. Б.Нурланова жастармен бірлесе отырып қыстың қызығын қызықтады. Қылышын сүйретіп жеткен қаһарлы қыстың бізге берер қызығы мен қуанышы көп. Осындай естен кетпес оқиғаларға толы қыс мезгілін керемет деуге толық негіз бар. Қыстың ғажайып ұмытылмас шақтары адам жанына шуағын шашып, нұрын төге түскендей, көтеріңкі көңіл-күй сыйлайды. 

«Дене тәрбиесі және спорт»

кафедрасының меңгерушісі

Муратбекова Айгуль

Оқытушы Амангалиев Мади