Сабақтың тақырыбы: Сыйластыққа үйренеміз

Сабақтың мақсаты:

• Сыйластықтың адамға жағымды әсерін түсіндіру.

• Бір - бірімен және үй ішінде сыйластықта болуға әдеттендіру.

Сабақтың көрнекілігі: эмоциялар көрсетілген суреттер

Сабақтың барысы

Психолог: Бәріміз жайғасып отырайық. Орындықта арқаны түзу ұстап отыру керек. Дұрыс отырып үйренген бала әдемі, сымбатты болып өседі. Бүгінгі сабағымыздың тақырыбы «Сыйластыққа үйренеміз».

• Айтыңдаршы, сендер сыйластық, сыйлау туралы не білесіңдер?

• Кімдерді сыйлау керек? Аналарыңды, әжелеріңді сыйлайсыңдар ма? Достарыңды ше?

Сендерге ата-аналарың әр түрлі жақсы, жылы сөздер айтады екен. Осындай «айналайын, жаным, ақылдым, күнім, алтыным» деген жылы сөздер естіген сендерге ұнайды, көңілденіп қаласыңдар.

Ендеше біз де бір-бірімізге жылы сөздер айтып үйренейік. Мен бастаймын, сендер жаныңда отырған көршіңе айтып жалғастырасыңдар. Ол рахмет айтуы керек.

Психолог: Аяулым, сен әдемісің!

Аяулым: рахмет. Фарида, сенің бантигің тамаша екен!

Фарида: рахмет. Нұрәлі, сен күштісің!

Бұл жаттығу балалардың жас ерекшелігіне байланысты психолог көмегімен орындалады.

Психолог: Сендер өте ақылды бала екенсіңдер. Көп жылы сөздер білесіңдер. Жарайсыңдар. Жаңа айтқан жылы сөздерді үнемі қайталап бір-біріңе айтып жүріңдер. Үйде де айтыңдар. Қазір өздеріңді ақылды Ханзада, сұлу Ханшайым деп елестетіңдер. Елестеттіңдер ме? Онда «Ханзада орманда келе жатты» жаттығуын орындаймыз.

«Ханзада орманда келе жатты» ойын жаттығуы

Мақсаты: қимыл-қозғалыс және сөйлеу белсенділігін, дене шынықтыру жаттығуларына қызығушылығын дамыту.

Барысы: Психолог балаларға ойын жаттығуын орындауды ұсынады, мұнда сөздерді қимыл-қозғалыспен үйлестіру керек. Кәне, бәріміз тіке тұрамыз. Менімен бірге қайталаңдар.

Ханзада орманда келе жатты (орнында аяқтың ұшымен 6 рет қадам жасайды, сол аяқпен қадам жасағанда - жұдырық түйеді, оң аяқпен адымдағанда – жұдырықты жазады).

Хан қызын жолықтырды, жолықтырды (орнында аяқ ұшымен 6 рет қадам жасайды, сол аяқпен қадам жасағанда - сол жаққа шапалақ ұрады, оң аяқпен қадам жасағанда – оң жаққа алақанмен шапалақ ұрады).

Кел, екеуміз секірейік, секірейік (орнында 6 рет 2 аяқпен кезек секіреді; алдыңғы жаққа шапалақ ұрады).

Тағы бір секірейік, секірейік (орнында 6 рет 2 аяқпен кезек секіреді; артқы жаққа шапалақ ұрады).

Қолымызбен шапалақ ұрайық, шапалақ ұрайық (орнында тұрып алдымен сол жаққа шапалақ ұрады, одан соң оң жаққа алақанмен шапалақ ұрады).

Қолымызды көтерейік (орнында 6 қадам жасап, әрбір қадамға қолды ашып, жұмады).

Психолог: жарайсыңдар. Бәрің де ақылды Ханзада мен сұлу Ханшайым бола білдіңдер. Олай болса, қандай жылы сөздер үйрендік, ұмытпас үшін кезекпен қайталап алайық.

Жылы сөздерді қайталап болған соң, қол шапалақтап, сабақты аяқтау.