Өзін-өзі тану пәнімен интеграцияланған «Ата сөзі-тәрбие көзі»

үйірме жұмысының сабағы

№6 ортаңғы топ

Тақырыбы: Әдептілік-әдемілік.

Мақсаты:1.Балаларды әдептілікке,инабаттылыққа, сыпайлыққа баулу;

2. Нақыл сөздер, тақпақтар жаттау арқылы тіл мәдениетін

қалыптастыру;

3.Әдептілік ережелерін күнделікті өмірде қолдана білуге

дағдыландыру.

Көрнекілері: тақырыптық суреттер,слайд-суреттер

Сабақтың өткізу тәсілі: саяхат-сабақ

Сабақтың барысы.

Ұйымдастыру кезеңі.

Шаттық шеңбері.

«Сіз», «біз» деген жылы сөз

Жылытады жүректі.

Баршаға керек жақсылық

Оятар игі тілекті.

-Балалар, бүгін біз сендермен «Әдептілік әлеміне» саяхатқа шығамыз.

Ол үшін барлығымыз әдемі, әдепті сөздерді еске түсірейік, сонда ғана бұл әлемнің есігі ашылады.

-Қандай әдепті сөздерді білесіңдер? (балалар жауабы)

Дұрыс, балалар, міне біздің «Әдептілік әлемінің» есігі де ашылды.

-Қош келдіңдер! (1-слайд)

-Балалар, «Сіз» деген әдеп, «Біз» деген көмек, әдептілік адам көркі дейді

қазақ халқы .

-Ал, әдепті адам-әдемі адам.

Енді әдемі сөздерді қайталайық:

-Қайырлы таң! Қайырлы күн! Қайырлы кеш!

-Сәлеметсіз бе?!

-Кешіріңіз.

-Рахмет.

-Көп жасаңыз.

-Жоғары шығыңыз, төрлетіңіз.

Тақпақ тыңдау.

Анаң сенің базардан

Алма сатып әкелді.

Ең үлкенін жақсысын

Саған таңдап әперді

Не деп барып жеу керек? (Ә. Дүйсенбиев)

-Рахмет, ана –деу керек.

-Ата-ананың тілін алған, үлкенді құрметтеген ,адамдарды сыйлаған, сыпайы сөйлеген баланы қандай бала дейміз? (әдепті, тәртіпті бала)

2-слайд –тақырыптық суреттер

-Мына сурет бойынша қай баланы тәртіпті дейміз?

-Ал қай бала тәртіпсіз?

Жақсы сөздер жаттайық.

1.Әдепті бала-арлы бала,

Әдепсіз бала-сорлы бала.

2.Үлкенді сыйлау-кішілік,

Үлгі мінез-кісілік.

3.Әдепті елдің баласы

Алыстан сәлем береді.

Сергіту сәті.

Үлкенге де сіз,

Кішіге де сіз.

Баршаңызды құрметтеп

Бас иеміз біз.

«Әдептілік әлеміндегі» саяхатты жалғастырайық.

3-слайд -тақырыптық сурет (үлкендеге-көмек,кішілерге-қамқорлық)

-Балалар, мына суреттерге қарап, бұл қандай бала екенін анықтайық.

Үлкендерді сыйлайды,

Кіші қамын ойлайды,

Сүймейді жат әдетті,

Қандай бала?- балалар бірге: әдепті бала

4-слайд-тақырыптық сурет (ата-әжесіне қамқорлық)

Құрметтейді атасын,

Ардақтайды апасын,

Көкесін жақсы көреді,

Үнемі көмек береді.

Қандай бала?- балалар бірге: әдепті бала

5-слайд- тақырыптық сурет (әкені құрметтеу)

Су құйдым да құманмен

Қолына әкемнің ,

Содан кейін оған мен

Орамалды әпердім.

Қандай бала екен ол?- балалар бірге: әдепті бала

- Балалар, бүгін біздің сабағымызға қонақ болып Дымбілмес келіпті,қонағымызды қарсы алайық.(қолында ыдыстағы гүлі бар)

Дымбілмес:-Ой мен қайда кіріп кеттім?

-Балалар, осылай кіруге бола ма?

-Кіргесін амандасу керек.

-Дымбілмес, біздің балалар әдепті балалар, сондықтан сені әдептілікке үйретеді. Кел, жоғары шық, төрлет, біздің балалардан үйрен-жамандықтан жирен.

Дымбілмес: Жарайды, онда менің сендерге әкелген сыйлығым бар,соны бірге күтіп, әдепті сөздермен өсірейік .(құмырадағы гүлге су құю)

Сендердің әдепті сөздеріңмен бұл гүл әдемі болып өседі.

-Балалар, біз қандай әдепті сөздерді білеміз?

(балалар бір-бір сөзден айтып отырып, бір қасықтан гүлге су құяды)

Міне, біз осындай сөздерді күнде айтып отырсақ, біз әдепті де әдемі болып өсеміз. Алдымыздағы гүл сияқты адамдарға қуаныш сыйлаймыз.

-Кәне, орнымыздан тұрып,бәріміз бірге «Әдептілік-әдемілік» деп сабағымызды аяқтайық.

«Біз өмірдің гүліміз» әнін шырқап, шаттық көңілмен қоштасу.

-Сау бол,Дымбілмес.

-Сау болыңдар, балалар.