Оқушылар шығармашылық үйі

Тәрбие сағаты

Тақырыбы: «Нұр себеле, Ұлыстың ұлы күні»

«Жас ұлан» аула клубы

«Шебер қолдар» үйірмесінің

қ.б.б.педагогі: Джусибалиева Б.Л.

Тақырыбы: «Нұр себеле, Ұлыстың ұлы күні!»

Мақсаты:Оқушыларға қазақ халқының ұлы мерекесі Наурыз мейрамы жөнінде түсінік бере отырып, халқымыздың салт – дәстүрін бойларына дарыту арқылы, шынайылыққа, адамгершілікке, ұлтжандылыққа тәрбиелеу.

Жүргізуші: Құрметті ата-аналар, қонақтар, балалар, Наурыз мейрамы құтты болсын! Сіздерге денсаулық, бақыт тілейміз, ақ мол болсын! Олай болса бүгінгі наурыз мерекесіне арналған «Нұр себеле, Ұлыстың ұлы күні» атты тәрбие сағатын бастайық!
Той дабылын қағып тұрған
Мұнда біз бар
Тыңдамағандарыңыз, тыңдаңыздар.
Наурыз тойы басталды,
Бір орында тұрмаңыздар.
Уа, жараңдар, жараңдар!
Көңілің бар алаңдар.
Ата менен анаң бар
Наурыз тойы басталды
Бәрің бері қараңдар.

Көрініс:Әжесі мен немересі

Әже: Махамбет, әжелерге көрістің бе, балам?

Баласы:Иә, әже, көрістім. Төлен атамдарға да кірдім.

Әже: Иманғали жезделерің де осы жаңа көрісіп шықты. Соларға бара ғой, құлыным. Түс болып қалды, үш үйдің есігін ашуға үлгермей қаларсың....

Баласы: Иә, әже, барып, көрісіп шығамын.

Әже: Әлгі Төлен кіріп шықпады ғой, жолым кіші демейді бұлар.

Келіні: Әжесі, бүгін келмесе, ертең кіріп көрісер.... Абыр-сабыр боп үлгермеген шығар, мүмкін келіп қалар.

(Осы кезде қонаққа өнерлі балаларын ертіп, әжей келеді)

Бибігүл әже: Сәлеметсіздер ме, Наурыз мерекесі құтты болсын! Ақ мол болсын! Ырыс – несібеміз арта берсін! Сәуле әжей, Наурыз мерекесі қарсаңында, өнерлі балаларымды ертіп, сізге арнайы көрісейін деп келе жатқан жайымыз бар. Балалар, әжелеріңізбен, қонақтармен көрісіңіздер.

Сәуле әже: Өркендерің өссін! Қош келдіңіздер! Төрге шығып, қонақ болыңыздар! Балалар сендер, осы Наурыз мерекесі, көрісу туралы не білесіңдер? Ендеше, мен сендерге өзімнің білгендерімді айтайын. (Сәуле әже әңгімелейді)

Балалар әжені тыңдайды.

Бибігүл әже: Әп, бәрекелді, білетінің бір тоғыз, білмейтінің тоқсан тоғыз деген осы екен. Балалар, Сәуле әжеміздің әңгімесі өте керемет екен. Біз әжейге келе жатқанда, мерекеде өнер көрсетеміз деп келген болатынбыз. Ендеше, не отырыс, өнерімізді көрсетейік.

Жүргізуші: Көптен күткен Наурыз тойы арайлы,
Нұрға бөлеп келе жатыр маңайды.
Мал біткеннің бал татыған уызы,
Қуат болып қанымызға тарайды.
Төрт түлік мал халқымыздың сүйері,
Көңілімнің күмбірлеген күйі еді.
Олай болса Сандыбаев Әділеттің орындауында Құрманғазының «Адай» күйі, қабыл алыңыздар.

Жүргізуші:Наурыз мерекесіне арналған өлең шумақтарын қабыл алыңыздар.

Жансая: Наурыз айы келгенде,
Күн шуағы шашылып.
Жылғалардан су ағып,
Ақ әжелер құлпырып.
Наурыз көже пісіріп,
Қонақтарға тартамыз.

Хафиза:Ақ қар кетіп қыс өтіп,
Шырайлы шуақ жаз жетіп,
Шаруаның ұлы кенелген,
Күн мейрамы ежелден—
Құтты болсын бұл Наурыз

Жүргізуші:Құлақтан кіріп бойды алар,
Әсем әнмен тәтті күй,
Көңілге түрлі ой салар,
Әнді сүйсең менше сүй, демекші «Наурыз» әнімен Жаулыбай Шахазза және Шұғыла қыздарымызды ортаға шақырамыз.

Аяжан:Наурыз келді еліме,
Наурыз келді жеріме,
Байлық, бақыт тілеймін.
Бүкіл қазақ еліне.

Эльвира:Көктем келді, балақай,
Жасарды жер, алақай.
Наурыз тойын тойлайық,
Әсем әнге салайық.

Жүргізуші:Ақ тілек бейбітшілік заман болсын!
Елім, жұртым қадірлі аман болсын!
Туғандай бір анадан жамағаттар,
Достыққа берік, мықты адал болсын!
Ұлыс оң болсын! Ақ мол болсын!

Жүргізуші:Көшкінбай Нұрайдың орындауында «Қара жорға» биін тамашалаңыздар.

Жүргізуші: Халық әні «Қоғалы- ай» орындайтын Жәнібек Жәния.

Жүргізуші:Тойымызды аша түсу үшін, біз ұлдар арасында ұлттық ойын ұйымдастырмақшымыз. Ойын «Күш сынаспақ» деп аталады. Екі бала ортаға шығып, қолдарымен күштерін сынайды.

Жүргізуші:Ұлы халқым есептескен
Ата салтын ешкім теппеген, аттап кетпеген
Мың пәледен құтқарады бір бата
Адам болмас бата естіп өспеген, - деп қазақта батаны көбінесе ер адам береді, міне біз де арамыздағы ұлдарымыздың бірінен бата беруін сұраймыз.
Ұлыс бақты болсын.
Әр күніміз жақсы болсын
Достығымыз берік болсын.
Ұлыс оң болсын
Ақ мол болсын.
Қайда барсаң, жол болсын.
Ұлыс бақты болсын
Төрт түлік ақты болсын!
Ұлыс береке берсін.
Пәле-жала жерге енсін.      
Қайғы-уайым жоқ болсын.
Ұлыстың ұлы күні құтты болсын

Барлығы: Әумин!

Жүргізуші: Ән қосылсын сәніңе!
Ырысты боп жаңа жыл!
Бақ дарысын бәріңе!
Ой қосылып ойыңа
Бас қосылып бойыңа
Аман-есен жетейік
Келер Наурыз тойына, - деп бүгінгі наурыз мерекесіне арналған тәрбие сағатымыз аяқталды. Назарларыңызға көп рақмет. Сау болыңыздар!