Тәуелсіздік қастерлі ұғым – ең қымбат қазынамыз

Тәуелсіздік – қазақ халқының ғасырлар бойы аңсаған арманы, ол бізге өз тағдырымызды өзіміз шешуге мүмкіндік берді. Қазіргі күрделі геосаяси жағдайда тәуелсіздікті сақтау – әрбір азаматтың борышы. Қазақстанның тәуелсіздігі – бұл қазақ халқының тағдырын түбегейлі өзгерткен және елдің болашақ даму бағытын анықтаған тарихи оқиға.

Тәуелсіздік – әр халықтың ұлы арманы мен асқақ мұраты, ал қазақ халқы үшін бұл ұғымның орны ерекше. Көп ғасырлық тарихымызда біз еркіндік пен бостандыққа деген ұмтылысымызды ешқашан жоғалтқан емеспіз. Жоңғар шапқыншылығынан бастап, кеңестік дәуірдің озбыр саясатына дейін талай ауыртпалықты бастан өткердік. 1991 жылы еліміз өз алдына тәуелсіздік алып, әлем картасында Қазақстан Республикасы деген атаумен таңбаланды. Осы сәттен бастап халқымыз егеменді ел ретінде өзіндік ұстанымын қалыптастырып, ұлттық құндылықтарын жаңғыртып, болашаққа нық қадам басты.

Тәуелсіздік алғаннан кейін Қазақстан демократия және құқықтық мемлекет принциптеріне негізделген тұрақты саяси жүйені қалыптастыра алды. Бұл елдегі көпұлтты қоғамда бейбітшілік пен келісімді қамтамасыз етуге мүмкіндік берді. Қазақстан әлемде ядролық қарудан ерікті түрде бас тартқан алғашқы мемлекет болды. Бұл қадам Қазақстанға халықаралық мойындау мен құрмет әкелді, сонымен қатар бейбітшіл ел ретіндегі беделін нығайтты.

Қазақстан халықаралық қатынастарға белсенді қатысушыға айналды. Ел өңірлік қауіпсіздікті нығайту және ынтымақтастықта маңызды рөл атқарады. Қазақстан сонымен қатар Сириядағы қақтығысты бейбіт жолмен реттеу бойынша Астана процесін құру сияқты бейбітшілік бастамаларымен танымал.

Қазақстанның тәуелсіздікке қол жеткізуі ел тарихындағы ең маңызды оқиғалардың бірі ғана емес, бүгінгі күрделі геосаяси жағдайда оны сақтап қалу – аса маңызды міндет. Бүгінде әлемде саяси шиеленістер мен қауіп-қатерлер жиілеп, мемлекетаралық қатынастардың тұрақтылығы мен қауіпсіздігіне елеулі қауіп төнуде. Осындай жағдайда Қазақстан үшін тәуелсіздікті сақтау – ұлттың бірлігі мен тұтастығын, халқымыздың қауіпсіздігін қамтамасыз ету деген сөз. Тәуелсіз ел болу – тек өз жерімізде өз құқығымызды қорғау ғана емес, өз саяси бағыт-бағдарымызды айқындау, ұлттық рухымызды нығайту, мәдениетіміз бен тілімізді, рухани құндылықтарымызды сақтап қалу және ұрпақтан ұрпаққа жеткізу болып табылады.

Осы орайда тәуелсіздікті сақтап қалу үшін не істеу керек?-деген заңды сұрақ туындайды. Әрине ең алдымен ұлттық бірлікті нығайтуымыз қажет. Қоғамның әр мүшесі үшін тәуелсіздік – бір ұлттың ғана емес, барша қазақстандықтардың ортақ байлығы. Сондықтан халықтың бірлігі, ел ішіндегі тұрақтылық пен татулық маңызды. Ал білім беру мен мәдениетті дамыту арқылы ұрпақтарымыздың бойына отансүйгіштік қасиетті дарытып, ұлттық тарихымызды, мәдениетімізді, тілімізді құрметтуге баулимыз. Әсіресе, жастар арасында осы құндылықтарды дәріптеу арқылы біз ұлттық болмысымызды нығайтамыз.

Ел өміріндегі маңыздымәселелердің бірі- экономикалық дербестік. Тәуелсіздікті нығайту үшін еліміз экономикалық жағынан да қуатты болуы тиіс. Әлемдік экономикадағы өзгерістерге икемді бола отырып, өзіміздің ішкі ресурстарымызды тиімді пайдалану, тұрақты даму жолын ұстану – болашақта елдің дербестігі мен еркіндігін сақтауға септігін тигізеді. Сонымен қатар, бейбітсүйгіш мемлекет ретінде Қазақстан әрдайым достық және бейбіт саясат жүргізуге тырысады. Аймақтық және әлемдік деңгейде қауіпсіздік пен тұрақтылықты нығайтуға атсалысу, көрші елдермен тату қарым-қатынас орнату, мемлекетаралық ынтымақтастықты дамыту – тәуелсіздігімізді сақтаудың маңызды шарттары.

Тәуелсіздігіміз – болашаққа деген сеніміміздің негізі, ұлтымыздың рухани күш-қуаты мен еркіндікке ұмтылысының символы. Оны қорғап қалу – бізге, қазіргі буынға жүктелген жауапкершілік. Қазақстанның жарқын болашағы үшін әрбіріміз осы мақсатқа үлес қосып, тәуелсіздіктің қадірін түсініп, оны сақтауға барынша атсалысайық.