Сабақ мақсаты:

Оқушыларға адам мен табиғаттың үйлесімді жаратылуының өзі ақиқат екенін ұғындыру.

Міндеттері:

• табиғат пен адамның үйлесімділігі туралы түсініктерін қалыптастыру;

• Оқушылардың бойына қамқорлық, жанашырлық, адалдық қасиеттерін дамыту;

• табиғатты аялауға, тазалық сақтауға тәрбиелеу.

Сабақ барысы:

1. Ұйымдастырукезеңi. Тыныштық сәтi.

2. Үй тапсырмасын тексеру. Оқулықтағы Аяғанованың «Табиғатпен тілдессем» атты өлеңін оқып, талдау.

Сұрақтар:

1 Табиғат туралы не білеміз?

2 Қалай ойлайсың, неліктен өлеңде адам мен табиғатты егіз деп бейнелейді?

3 «Ол ауырса сенің де ауырғаның,

Ол сауықса сенің де сауыққаның» дегенді қалай түсінер едіңдер?

4 Табиғатпен тілдесуге бола ма?

3. Дәйексөз.

Адамзаттың табиғатсыз күні жоқ,

Мұны айтуға табиғаттың тілі жоқ.

Шыңғыс Айтматов

Дәйексөзді хормен оқу,қайталау

Дәйексөздің мәнін ашу.

Табиғат адамзат баласы үшін ең қасиетті ұғым. Өйткені ол адамның өзін дүниеге келтіретін аяулы анасы іспетті. Табиғат-Ана деуімізде содан. Табиғат пен адам өте тығыз байланысты.

Бұдан нағыз ақиқатты көруге болады.

4. Әңгiмелеу

Аңыз әңгіме «Жайнап өскен гүлдің құпиясы»

Ш. АМОНАШВИЛИ

Мамасы Ергеннің бөлмесіне ыдысқа отырғызылған екі гүлді әкеліп, терезесінің алдына қойды.

Күнде суарып тұр, олар саған қуаныш сыйлайды – деді мамасы.

Ал Ергенге бір гүл ұнады да, екінші гүл ұнаған жоқ.

Ол ұнаған гүлін суарған кезде іштей: «Қандай керемет гүл...Мен сені жақсы көремін.» деп ойлап суаратын. Ал ұнамаған гүлді суарған кезде: «Бұл жаман гүл. Босқа суарып жатырмын. Мамамның көңілі үшін суарып жүрмін , әйтпесе терезеден лақтырып жіберер едім!» деп іштей ұрсып тұратын.

Осылай бірнеше ай өтті.

Бір күні мамасы бір гүлдің жайнап өсіп келе жатқанын, ал екінші гүлдің солып бара жатқанын байқады да, баласынан:

-Неге бұлай? Әлде біреуін дұрыс суармадың ба?- деп сұрады.

-Екеуін де бірдей суарып жүрмін - деді баласы.

Мамасы солып бара жатқан гүлді өз бөлмесіне апарып қойды да, оны мәпелеп, күтіп: «Мен сені емдеймін. Әлі керемет болып өсесің.» - деп күлімсіреді. Суарған сайын көз алдына: осы гүлдің иісі аңқып, жайнап гүлдеп, жайқалып өсіп тұрған кезін елестетіп тұратын.

Мына ғажапты қараңыз, мамасының жақсы ойы жүзеге асып, қуанышқа кенелді. Солып жатқан гүлдің жанданып, жайнап өсіп тұрғанын көрген Ерген:

-Мама, сен бұл гүлдерге не істедің? – деді.

-Өзім де білмеймін! – деп жауап берді мамасы.

Бұл құпияны тек ыдыстағы топырақ пен әдемі гүлдің өзі ғана білетін. Бірақ олар айта ала ма?!

Сұрақтар:

1. Мамасы баласының бөлмесіне гүлдерді не үшін әкелді?

2. Ерген гүлдерді қалай суарды?

3. Гүлдердің әртүрлі болып өсуіне не әсер етті?

4. Солып қалған гүлдің жайнап өсуінің құпиясы неде деп ойлайсыңдар?

5. Шығармашылық жұмыс, топтық жұмыс.

Балаларды 2 топқа бөлеміз. Баяу музыка ойнайды.

Өлең шығару.Табиғат туралы төрт жол өлең шығарып көр.

Әр топ өз жұмысын қорғайды

Балаларға өз нұсқамды оқып беруге болады.

Таза болса табиғат, аман болар адамзат

Таза ой болса әрқашан, ісің сенің ғаламат

Отбасында, мектепте тазалыққа үйретсе,

Үлкен жүгі ғасырдың ұстаздарға аманат.

6. Топпен ән айту.

Біз өмірдің гүліміз

Сөзі Ә Дүйсенбиевтікі

Әні Б.Ғизатовтікі

Зеңгір көктен

Нұрын төккен

Ортақ біздің күніміз.

Жайдары өскен,

Жайнап өскен

біз өмірдің гүліміз.

Бал достыққа,

Жолдастыққа

Шақырады әніміз,

Тыныштықта,

Нұр құшақта

Бақыттымыз бәріміз!

7. Үй тапсырмасы.

Оқулықтағы 32 сабақ. 152 беттегі «Алтын балық» ертегісін оқып, талдау.

Дәптердегі 31 сабақтағы тапсырма беріледі.

8. Соңғы тыныштық сәтi.

Жай музыка қойылады.

Құрметті оқушылар жайланып отырып, көздеріңізді жұмып, бүгінгі сабақтан алған жақсы әсерлеріңізді еске түсіріңіз.

Табиғаттың әсемдігінен адамның жандүниесі керемет ләззат алатынын сезініп көр. Бүгінгі сабақтың жақсы сәттерін жүрегіңізге түйіп алыңы