Ұстаздық

Шәкірт ұстазды білім берген, дүниеге көзімді ашқан, өмір сүрудің шынайы мәнін ұғындырған, тіршілігімді мағыналы, мәнді еткен адам деп шексіз сыйлап, қастерлейді. Ежелгі заманның әйгілі қолбасшысы Ескендір Зұлқарнайынның Аристотельді, Абылай ханның Төле биді, ғұлама оқымысты әрі ұлы ақын Шәкәрімнің Абайды, Бердақтың Күнқожаны, Шыңғыс Айтматов пен Кіндік Азиядағы туыстас түркі елдерінің осы заманғы көптеген дарынды өкілдері мен қазақтың аса көрнекті ақын-жазушылары, ғалымдарының Мұхтар Әуезовті «ұстазым» деп шексіз ардақтағаны және ардақтап келе жатқаны – соның айғағы.

«Ұстаздық еткен жалықпас үйретуден балаға» деп ұлы Абай айтқандай, ұстаздық атаққа азапты еңбек, шынайы шеберлік арқылы ғана жетуге болады.

Атақты жазушы Мұхтар Әуезовтің «Ел боламын десең, бесігіңді түзе» деген өте терең мәнді, әдемі нақылы бар. Ол еліңнің ертеңі – жас ұрпағыңды жақсылап өсір деген сөз ғой. Осы міндеттің көп салмағы мұғалім, тәрбиешілерге түсетіні аян.

Сондықтан елдің ертеңі күніне сенімін орнықтыру, өнімді де шығармашылық еңбекті өрістету, қоғамды кернеп бара жатқан бұзақылықтарға қарсы күшті тосқауыл қойып, адамдардың бейбіт өмірін қамтамасыз ету – бүгінгі күннің мағыналы мақсаты. Тәрбиелеу мен тәрбиеленудің, ұстаздық пен шәкірттіктің табиғи арнаға түсіп, ардақты да беделді орнына ие болуы осындай игі істермен сабақтасып жатқанын мойындағанымыз жөн. (170 сөз)

Ж.Базарбаев

Ғаламтор материалы:

16. Ұстаздықтың ешбір жалқаулықты қажет етпейтін мамандық екені туралы қай азат жолда айтылғанын табыңыз.

А) 3

В) 2

С) 4

D) 2-3

Е) 1

17. «Ел болам десең, бесігіңді түзе» деген нақыл сөздің мағынасын ашатын қатарды көрсетіңіз.

А) Білімді болғың келсе, оқуыңды жақсы оқы.

В) Болашағыңды бүгіннен ойла.

С) Жастардың өмірі жарқын болсын десең, тәрбиені балаға дұрыс бер.

D) Ертеңгі күнің үшін аянбай жұмыс істе.

Е) Халқыңның келешегі жарқын, жақсы болсын десең, бала тәрбиесіне ертерек көңіл бөл.

18. Мәтіннің қай стильге жататынын белгілеңіз.

А) Ауызекі сөйлеу стилі

В) Публицистикалық стиль

С) Ғылыми стиль

D) Көркем әдеби стиль

Е) Ресми іс-қағаздар стилі

19. «Дүниеге көзімді ашқан» сөз тіркесінің мағынасын ашатын қатарды көрсетіңіз.

А) Білім үйреткен

В) Тәрбие берген

С) Өнер үйреткен

D) Жазу үйреткен

Е) Сыпайылықты үйреткен

20. «Шәкірт» сөзінің синонимдік қатарын табыңыз.

А) Үйренуші, жаттықтырушы

В) Жаттықтырушы, дәріскер

С) Оқушы, үйретуші

D) Білім алушы, жаттықтырушы

Е) Оқушы, үйренуші