№ 1 сабақ

Сыныбы: 4сынып

Пәні: Ана тілі

Сабақтың тақырыбы: Жылқы (С.Мұқанов)

Сабаққа рефлексия №1

Сабақ қалай өтті?

Сабақ бастағанда топқа бөліп алу үшін төрт түлік жайлы не білетінін сұрадым. Оқушылар төрт түлікке түйе, жылқы, сиыр, қой, ешкі жататынын, олардың үйде өсірілетінін , сүті,еті терісі пайдалы екенін , көлік ретінде пайдасы бар екенін айтты. Төрт түлік атауы бойынша 5 топқа бөлініп,партаның үстіндегі үй жануарлардың мүсініне қарап өз орындарын тауып отырды. Ынтымақтастық атмосферасын қалыптастыру мақсатында алда қандай мереке келе жатқанын сұрадым. Оқушылар 8 наурыз қыздар,әйелдер ,аналар мерекесінің келе жатқанын айтты. Әр топтағы ұлдар қыздарға «Жүректен жүрекке» деп аталатын жаттығу бойынша тілек айтты. Қыздардың көңілдері көтерілді. Үйге не берілгенін сұрап, үй тапсырмасын бағалау критерийі бойынша бағалайтынын айтып өттім. Мәнеріне, мазмұнына, белсенділігіне қарай топтың бағасын шығаратынын айтып өттім. «Бақшада» әңгімесінің мазмұнын топ бойынша сұрап бағасын тақтаға қойып отырдым.Математика сабағымен байланыстырып әр топтың үй тапсырмасының бағаларын әр топтан бір оқушы шығып, келесі топтың бағасын қосып, топтағы оқушылар санына бөліп орта балын шығарып жазды. Түйе тобы: 5,5 10:4=2,2 Жылқы тобы: 5,5,5,4 19:4=4,3 Сиыр тобы: 5,5,5,5 20:4=5 Қой тобы: 5,5,5,4 19:4=4,3 Ешкі тобы: 4,5 9:4=2,1 Осы топтардағы балы ең жоғары Сиыр тобынның құрметіне шапалақтадық.

Қызығушылығын ояту мақсатында «Кім тапқыр?» ойыны арқылы графопроектор арқылы сөзжұмбақ шештірдім. Әр топ жауаптарын өздері жазып , жасырылған сөзді тауып, жаңа сабақтың тақырыбын ашып алдық . Жылқы. «Миға шабуыл» әдісі бойыншы Жылқы қандай мал? Жылқының қандай пайдасы бар? Өздерің жылқы бағып көрдіңдер ме? Деген сұрақтар қойып оқушылардан жауап алынды. Мәтіннің өзекті ойын ашып алу үшін топтарға Джиксо әдісі бойынша тапсырма берілді. Әр топ өздерінің білгендерін, кітаптан оқып постер бетіне жазды. Тапсырманы бірінші біткен «Түйе» тобы :Жылқының пайдасы туралы айтты. « Жылқы» тобы: Жылқының пайдасы туралы айтты. «Сиыр» тобы: Сәбит Мұқановтың өмірі туралы, оның еңбектері туралы, «Ешкі» тобы: Жылқы жайлы қысқаша әңгіме жазып шықты. «Қой» тобы: Жылқының жасына қарай аталуын постерге жазып оқып берді. Осы әңгімеден жылқы жайында не білді? Не түйгені? жайлы қорытындылап, сабақтан алған әсерлерін стикерге жазып смайликтер бейнесіне жапсырды. Үй тапсырмасына «Жылқы» әңгімесін оқып, мазмұнын айтуға бердім.

Не сәтті өтті?

Оқушылар берген тапсырмаларды орындау үшін бірлесіп,қызыға жұмыс істеді. Топтық жұмыстың нәтижесінде біршама тақырыптарды қамтып,жаңа тақырыпты меңгерді деп ойлаймын .Сөз жұмбақты қызыға шешті.

Не сәтсіз өтті?

Топқа бөліну кезінде оқушылар қатты шулап , кейбіреулері орындарын таппай қарап қалды.Тапсырмаларды орындау кезінде біршама оқушылар өз ойларын толық жеткізе алмады. Өздерін бағалау кезінде бағаларын жоғары қойды. Постермен қорғау кезінде үлгерімі төмен оқушыларға жауаптарын толықтыру үшін үнемі жетек сұрақтарын қолдануға тура келді. Жұмбақтарды телефон арқылы естіртемін деп ойлап келген едім, бірақ телефоннан даусы жақсы естілмей қалды. Өзім оқығанда кішкене қателесіп кеттім.

Қандай күшті жақтарға сүйендіңіз?

Оқушылардың әрбір сөзінің мен үшін маңызды болатындығына мән бердім және олардың сенімдеріне ие болдым деп ойлаймын. Әр сабақта оларды ынталандыру үшін бәрекелді, жақсы, өте жақсы деп мақтап олардың айтқан әрбір сөздеріне мән бере жүріп, қайта бағыттау сұрақ қою тәсіліне сүйендім. Әр сабақ сайын, үш шапалақ арқылы өздерінің жұмысын аяқтағанды білдіріп отыруы сыныптағы тәртіптіліктің белгісі.

Келесі жолы жоспарым.

Келесі сабағымда оқушылардан үй жұмысын сұрау мақсатында «Шеңбер ішіндегі әңгіме» жүргіземін. Жаңа сабақты түсіндіру кезінде оқушыларды топқа бөлуді және бірігіп жұмыс жасау кезінде қиындық болмайтындығын, «Айналмалы бекеттер» әдісі бойынша постер қорғаудың тиімділігін өз жоспарыма ендіремін.

№ 2 сабақ

Сыныбы: 4сынып

Пәні: Ана тілі

Сабақтың тақырыбы: Еріншек

Сабаққа рефлексия №2

Сабақ қалай өтті?

Мектептегі тәжірибе кезеңіндегі тізбектелген сабақтар топтамасындағы екінші сабағымды11.03.2014 жылы «Еріншек»тақырыбында өттім. Сабақты бастамас бұрын оқушылардың көңіл күйін сұрап алдым. Оқушылар көңіл күйінің жақсы екенін айтқан соң Біз не үшін шүкіршілік етуміз керек? Деген сұрақ қойылды. Сонда балалар сыни тұрғыда ойланып, деніміздің саулығына, ата-анамыздың аман-есен алдымызда болғанына, осындай үлкен.жарық мектепте оқығанымыз үшін, тыныштық заманда өмір сүргеніміз үшін, елбасымыздың жақсы адам болғаны үшін т.б шүкіршілік етеміз деп жауап берді. Үй тапсырмасын «Шеңбер ішіндегі әңгіме» әдісі бойынша «Жылқы» әңгімесін сұрадым. Оқушылар өз түсініктерін айта жөнелді. Сағат тілінде екі рет ауыстырып отырғыздым. Үйден оқып келгендеріңнен басқа құрдастарыңнан не үйрендіңдер? Сені таңқалдырған жайттар болды ма?деп сұрағанда . Түсінбеген жерін түсініп алғандарын , жылқының басқа да пайдасы жайлы түсінгенін айттыОсы сұрақтарға жауап беру арқылы оқушылар сыни тұрғыдан ойлана алатынын байқадым.. Жаңа сабақты Абай Құнанбаевтың «Ғылым таппай мақтанба »деген өлеңімен бастағым келіп тұрғанымды айттым. Кәне кім айтады? Деп оқушылардың есіне түсіртіп, өздеріне айтқыздым. Абай атамыздың бес асыл іс деп отырғаны нелер ? (Талап, еңбек, терең ой, қанағат, рақым) осы аталған «Талап», «Еңбек», «Рахым»,Қанағат болып төрт топқа бөлінді. Жағымсыз қасиеттердің ішіндегі ең нашары не деп ойлайсыңдар ? Өзіңнің бойында қайсысы бар деп ойлайсыңдар? Шәкәрім Құдайбердіұлы кім? Проекторды пайдаланып слайтта өмірбаяны мен еңбектері жайлы көрсетіп оқып бердім де , «Еріншек» өлеңін өтетінімізді айттым . Сабақтың мақсаты өлеңді мәнерлеп оқи отырып адам бойындағы жағымсыз қылықтырды ажырата алып жақсыдан үйреніп, жаманнан жирену керектігін айттым.

Оқулықпен жұмыста оқушыларға тізбектеп топ бойынша оқыттым . «Айналмалы бекет» әдісі бойынша топтарға тапсырма беріліп шартын түсіндірдім. Уақыт белгіленіп ауысамыз дегенде оқушылар басқа топтың тапсырмасын дұрыстығын тексеріп, толықтырып кетеді .1топ-Адам бойындағы жақсы қасиеттері. 2 топ- Еріншек адамның бойындағы жағымсыз қылықтар. 3-топ Еріншек , жалқауға байланысты мақал -мәтелдер жазу, мағынасын түсіндіру . 4-топ.Еңбекке байланысты әңгіме жазу.Постермен жұмыс жасап қорғау. Оқушылар қызыға, әрі тез орындап, қорғады. Тапсырманы жақсы орындаған топты мадақтап ,шапалақпен қошеметтеп қойдық.Сөйлемейтін оқушылардың өздері де қатысты.Жаңа сабақты тест арқылы қорытындылап ,қасындағы оқушылар тексеріп бағасын қойды. Оқушылар сабақтан алған әсерлерін, ұсыныстарын стикерге жазып,смайликтер бейнесі түсірілген плакатка жапсырды. Үйге «Еріншек» өлеңін жаттап келуге берілді.

Не сәтті өтті?

Топқа бөліну кезінде бірінші күнге қарағанда бүгін тез бөлініп, орындарын тауып алды. «Шеңбер ішіндегі әңгіме» әдісі арқылы үй тапсырмасын сұрағында оқушылардың барлығы қатысып, білгендерін айтты. «Айналмалы бекет»арқылы оқушылар білгендерін жазып қызыға қатысты. Оқушылардың сабаққа деген белсенділігі артып,өз ойларын тұжырымдап айта білу дағдысы қалыптасты, топтық жұмыс жүргізу әдісім алға жылжыды, оқушылар жақсы меңгерді.

Не сәтсіз болды?

Уақыт жетпей қалуына байланысты бағалау парағының қорытындысы оқылмай қалды. Ұяң бір оқушым сабақ барысында өз белсенділігін көрсете алмады.

Келесі жолы жоспарым.

«Кім тез табады?» ойыны арқылы сөзжұмбақ шештіру. «Мозайка»әдісі арқылы оқушылардың білімін жетілдіру үшін топ бойынша постермен жұмыс орындату.

№ 3 сабақ

Сыныбы: 4сынып

Пәні: Ана тілі

Сабақтың тақырыбы: Жаз келер

№3 Сабаққа рефлексия :

Сабақ қалай өтті?

Үшінші сабағымды 12.наурыз күні Ш.Құдайбердіұлының «Жаз келер» тақырыбында өттім. Сабақты психалогиялық дайындықпен бастадым.

Мен бақытты баламын

Жан дүниемде күн нұрлы

Жылуым мол бойымда

Осы жылуымды жер бетіндегі барлық адамдарға жолдаймын.

Менің оқығым келеді! Білімді, алғыр болғым келеді! Деп айтқан соң үйге берілген «Еріншек» өлеңін топпен жарыстырып сұрадым. Криттерий бойынша бағаларын әртоптан оқушылар шығып кейінгі топтың орта балын есептеп математика пәнімен байланыстырдым.

Қызығушылығын ояту мақсатында: -Қазір қандай мезгіл? Көктем жайлы не білесіңдер? Кім? Не айтады ? дегенде көктемде болатын құбылыстарды оқушылар білгендерін айтты. Жыл мезгілдеріне байланысты 4 топқа (көктем, жаз, күз,қыс) болып бөлініп, орындарына отырып алды.

«Кім, тез табады?» ойыны арқылы сөзжұмбақ шештіріп , жаңа сабақтың тақырыбын ашып алдық.Жаз келер бұл кімнің өлеңі? -Ш.Құдайбердіұлының өлеңі деп оқушылар айтты. Кітаптан Ш.Құдайбердіұлының өмірі жайлы оқушыға оқыттым. Түсіндірме сөзді талдатып, оқушыларға оқыттым. «Мозайка » әдісі бойынша 4 топқа тапсырмалар берілді.

1тапсырма. Өлеңдегі негізгі ойын түсіндіру.

2тапсырма. Өлеңнің желісі бойынша сурет салып,қорғау.

3тапсырма.Ш.Құдайбердіұлының өмірі жайлы не білесің?

4тапсырма. Жазға байланысты әңгіме құрау,мақал-мәтел, өлең айту.

Топқа түскен тапсырмалар бойынша оқушылар топтасып жұмыс жасады.

Тапсырма орындау кезінде олардың арасындағы ауызбіршілік байқалды . Жаңа сабақта не үйренгендерін «INCERT» әдісімен анықтадым және оқушылардың бүгінгі сабақтан алған әсерлерін рефлексия арқылы анықтап үйге тапсырма бердім.

Не сәтті өтті?

Оқушылардың сабаққа деген белсенділігі артып,өз ойларын тұжырымдап айта білу дағдысы қалыптасты, топтық жұмыс жүргізу әдісім алға жылжыды, оқушылар жақсы меңгерді.

Не сәтсіз болды?

Уақыт жетпей қалуына байланысты бағалау парағының қорытындысы оқылмай қалды. Ұяң бір оқушым сабақ барысында өз белсенділігін көрсете алмады.

Келесі жолы жоспарым.

«Жаз келер»өлеңін «Кім айтқыш » ойыны арқылы топ бойынша жарыстыру.Оқушылар жаңа сабақты түсіну үшін «Наурыз »жайлы видиоролик дайындап келу.Бүгінгі сабақта болған кемшіліктерді келесі сабақта болдырмау.

№ 4 сабақ

Сыныбы: 4сынып

Пәні: Ана тілі

Сабақтың тақырыбы: Наурыз М.Дулатов

№ 4 Сабаққа рефлексия :

Сабақ қалай өтті?

Сабақты «Ыстық алақан» әдісі бойынша тілек айтқызудан бастадым . Оқушылар ,денің сау болсын, жақсы оқы , өскенде ғалым бол, оқуда озат бол т.б. тілектерін шын көңілмен білдірген соң, сиқырлы қобдишадан тірек сөздер жазылған парақшаларды алып өз топтарын тауып отырды. Парақшада құстардың,гүлдердің, жәндік аттары,табиғат құбылыстардың аттары жазылған еді. Үйге берілген «Жаз келер»тапсырмасын жатқасұрадым. «Ой қозғау» Ақын жаз көрінісін қалай суреттеген? Адамдар туралы қай шумақта айтылған? Шәкәрім туралы не білеміз? Деген сұрақтар қойылды . Балаларсыни түрде ойланып, түсінгендерін айтып жақсы жауап берді.Топ бойынша жарысып бағаларын қойып, топтың орта балын шығарып, алда келе жатқан топты мақтап, қол шапалақпен қошеметтеп қойдық. Оқушылардың қызығушылығын ояту мақсатында «Кім тапқыр» сөзжұмбақ дайындап келгенмін , барлық оқушы қатысуға тырысты. 1.Қасиетті тағам. 2. Түс түрі. 3.Киіз үйдін сүйегі. 4. Сүт өнімі. 5. Биенің сүті. 6.Аналарымыздың білекке тағатын бұйым дегенде оқушылар тапқан дұрыс жауаптарын өздері жазып шығып, жаңа сабақтың тақырыбын ашып алды. Міржақып Дулатовтың өмірбаянымен танысты . Оқушылар кітаптағы өлеңді топ бойынша тізбектеп оқыды . Наурыз дегеніміз не? деп сұрақ қойғанда оқушылар көктемнің бірінші айы, қазақтың жаңа жылы, жаңа күн деп жауап берді. Наурыз айында қандай өзгерістер болады? Дегенде күн жылиды, қар ериді, құстар жылы жақтан ұшып келеді, ағаштар бүршік жарады, жер көгереді, 8 наурыз, 22 наурыз мерекелерін тойлаймыз деп жауап берді . Наурыз мерекесі жайлы видио ролик көрсетіп, «Мозайка» әдісі бойынша оқушыларға тапсырмала берілді.

Наурыз мерекесі жайлы не білеміз? Қазақтың ұлттық тағамдары . Ұлттық киімдері. Қазақтың ұлттық ойындары. Әр топ тапсырмаларын постерге жазып тапсырмаларын орындап болған соң ,топ бойынша шығып қорғады.Төртінші топ наурыз мерекесі жайлы білетінін айтып видио роликтен 14 наурыз-Көктем күні. Бұл күні көктемнің алғашқы мерекесімен гүлмерекесі , 15 наурыз- Өніс күні. Ағаштар егіліп, егіске жер әзірлеу жұмыстары істеледі. 16 наурыз- Алас күні . Адамдар ескі дүниелері,киімдерінен құтылып, тазаланады. Жаппай көше жинау жұмыстары жүргізіледі. 17 наурыз-Береке күні Наурыз көже пісіріліп, халыққа тегін таратылады.. Мерекелік дастарханға әзірлік жасайды. 18 наурыз-Қайырым мен мейірім күні. Жоқ-жітік адамдарға садақа беріліп , байлар жомарттық жасайды. Зират басы тазаланады. Өмірден өткендерге шелпек пісіріліп, дұға жасалады екен деп айтты. Бірінші топ қазақтың ұлттық киімдері жайлы кимешек, бөрік, саукеле,шапан туралы жеке айтып өтті .Бұл топта Ербол деген бала үлгерімі төмен болғанымен суретті жақсы салатыны байқалды. Қазақтың ұлттық ойындары бойынша екінші топ постерге ойын түрлерін жеке жазып, оларжайлы қысқаша мәлімтберді. Көрініс ретінде «Асық»ойынын және «Қазақша күрес » ойынын көрсетіп берді.Қазақтың ұлтық тағамдары бойынша үшінші топ постерге тамақтардың аттарын жазып , суреттерін салған оны ұсыну туралы айтып берді .Наурыз мерекесінде жасалатын «Наурыз көжеге» қосылатын тағамдарды айтып шықты. Соңында наурызға дастархан батасын берді. Бірінші және екінші топқа өте жақсы деген баға қойылып қол шапалақтау әдісі бойынша ынталандырдық. Сабақ соңында «Түртіп алу»әдісі бойынша бүгінгі сабақта «Не білемін», «Не білдім?» «Не білгім келеді? түрткізіп стикерге сабақтан алған әсерлерін ұсыныстарын стикерге жазып смайликтерге ілдірттім. Үйге өлеңді жаттап келуге бердім.

Не сәтті өтті?

Топқа бөлінген кезде оқушылар оқыған сөздерін тез түсініп, орындарын тез тауып отырды. Берген тапсырмаларды орындау кезінде бірлесіп,қызыға жұмыс істеді. Топтық жұмыстың нәтижесінде біршама тақырыптарды қамтып,жаңа тақырыпты меңгеру барысында, сынып белсенділері өз топтарындағы үлгерімі төмен оқушыларға үйретіп,олардың да өз ойларын айтуына мүмкіндік берді.

Не сәтсіз болды?

Төртінші топтың жауаптары ойымдағыдай болмай шықты. 45 минуттан асып кеткені.

Келесі жолы жоспарым.

Келесі сабақтарымды кемшіліксіз, оқушыларға жан-жақты білімді ізденіп, оларға жақсы бағыт бағдар бере отырып үлкен белестерге шығуды жоспарлаймын.