«Тұғырлы тәуелсіздікке 30 жыл»

«Тұғырлы тәуелсіздікке 30 жыл»

Тәуелсіздік түскен жоқ қой аспаннан,

Тарихы оның тым алыстан басталған

Бодандықтан құтқарам деп елімді,

Қанша боздақ қара жерді жастанған.

Қандай да бір елдің басты байлығы, бақыты ол – тәуелсіздік. Тәуелсіздік білектің күшімен, найзаның ұшымен келген ащы термен жеткен тәтті жеңіс. Тәуелсіздік – ұрпаққа берілген аманат.

1991 жылдың 16 желтоқсаны қазақ жадында мәңгілікке сақталатын күн. Осы жылы Ләззат, Сәбира, Тұрар сынды батыр ұлдарымыз бен қыздарымыз елі үшін өз жандарын пида етті. Болашақ ұрпақтың ертеңгі күні бұлыңғыр болмас үшін, аяқтарынан алған ызғарлы желтоқсанның суығын сезіне тұра ашық түрде майдан алаңына шықты.

Қазақстан дербес мемлекет болып тәуелсіздік бесігінде тербелгелі 30 жыл. Осы уақыт аралығында еліміз етек-жеңін жиып, шекарасын бекітіп, өз алдына дербес зайырлы ел болды. Ресей боданы болған Қазақстан 1991 жылы 16 желтоқсан күні өз егемендігіне ие болып, ата-баба арманын орындады. Өз президентін тағайындап, ұлты мен ұлысын түгендеп, ата-бабамыздан келе жатқан салт-дәстүрін қайтадан жаңғыртып, дінін қабылдады.

Қазақ елінің өз алдына республика болып жариялануын қалаған, дербестігімізді бірінші болып мойындаған ел – Түркия. Бұл тәуелсіздікті бір ел ғана емес, бүкіл ел болып қолдайды деген сөз. Себебі, тәуелсіздік – бақытқа апарар жолдың бастауы. Өз алдына дербес мемлекет қана өзінің ана тілін сақтап, өзінің халқының құқығын қорғап, салт-дәстүрін ұстанып, бірлікшіл елге айнала алады.

Ал іргесі қаланған жаңа республиканың әрі қарай дамып, белсенді өмір сүруі үшін бар халықтың бірлігі, ерен еңбегі керек. Ерен еңбектің нәтижесі елдің ішкі және сыртқы әлемі, экономикасы, валютасы деген сияқты көптеген құндылықтарға келіп тіреледі. Аталған құндылықтарды отыз жыл ішінде үлкен мақсатқа айналдырған еліміз өз астанасын да бекітті. Тіпті бүгінде Нұр-Сұлтан қаласы арман қалаға айналды. Апортына бүкіл ел сүйсінген Алматының өзін мәдениет пен әдебиеттің қаласына айналдырды. Өзінің ішкі туризмі, теңгесі, ұзын сонар қара жолдары тарамдалып жатыр.

21-ғасыр балалары нағыз бақытты балалар! Олар дүние есігін ашқан сәтте еліміз ашық аспан астында, бірлігі мен татулығы ұйыған, ешкімге мұқтаж емес жеке-дара мемлекетке айналған. Осы қолымыздағы бақты тайдырып алмай, оны бағалап, тәуелсіздіктің кепілі ретінде қызмет жасауымыз керек. Ата-баба аманатына қиянат жасамай, бұл тәуелсіздікті ертеңгі ұрпаққа табыстау – біздің қолымызда. Еліміз мәңгілік тәуелсіз ел болып дами берсін!