ҰБТ- ға қалай дайындыламын?

2025 жылы мектеп бітіріп, үлкен өмірге қадам баспақшы болып отырған жас түлектердің бірі менмін. 10-сынып бітірген оқушының басына келетін бірінші ой ҰБТ ға дайындығымды қалай және қашан бастаймын деген сұрақ. Осы сұраққа өте көп ойланып маусым айынан-ақ өз дайындығымды бастағанмын. Қазіргі уақытқа дейін үзбей дайындалып, біраз нәрсе түсініп, үйреніп қалдым. Енді өзім секілді 11-сыныпқа аяқ басып, өз дайындағын неден бастарын білмей жүргендерге кішігірім кеңестеріммен бөліскім келіп отыр.

Ең бірінші өзің қалайтын мамандықты таңда, кейінірек соған сай ҰБТ тапсыратын пәндерді анықта. Көп оқушылар өздеріне ұнайтын пәндерді таңдап, кейін кім болғысы келетінін, қай мамандық бойынша білім алғысы келетінін шеше алмай бас қатырады. Енді біреулер ата- анасының шешіміне, грант санына қарай шешім қабылдап,дайындалып, дайындығын соңына дейін апармай, жақсы нәтиже көрсетпей жатады. Сол себепті әубастан мамандық мәселесін шешіп алған жөн.

Екіншіден, дайындығыңды мүмкіндігінше ерте баста. Ең қарапайым кеңес болып көрінгенімен, шынымен, біз білмейтін ақпарат көп. ҰБТ барлық мектеп бағдармаласын қамтитын тест. Ал біз бұл тестті бес пән бойынша тапсыратынымызды ескерсек қайталап оқу, пысықтау керек білім өте көп. Дайындығын бастамаған адам аз уақытта үлгеремін деп ойлауы мүмкін. Тек дайындықты бастаған соң ғана өзіңнің біліміңнің деңгейін көріп, әлі біраз нәрсені білмейтініңді аңғарасың. Қысқасы, дайындықты қаншалықты ерте бастасаң, соншалықты жақсы нәтиже көрсетесің.

Өзіңе ұнайтын саланы таңдаған соң өз бетіңше дайындаласын ба, әлде білім беретін мекемелер мен курстардың көмегіне жүгінесің бе сол жағын ойлан. Егер сен өз бетімше дайындалу қиындық туғызады деп ойласаң білім беру орталықтарына жүгінген дұрыс. Қазір нарықта білім саласында сапалы қызмет етіп жүрген курстар өте көп. Соның ішінде өзіңе қолайлы, ұнамды орталықтарды мұқият іздеп, тексеріп, содан соң шешім қабылдағайсың. Өйткені талапкерлерді алдап, арзан тірлікпен айналысып жүрген орталықтар да аз емес. Ал егер өз бетіңше дайындалуды қаласаң, бұл да өте тиімді шешім. Өйткені қазір ғаламторда ҰБТ-ға дайындайтын сабақтар, бағдарламалар, қосымшалар жеткілікті. Осылай дайындалып, жақсы нәтижеге жеткендер де аз емес.

Егер мен секілді қосымша сабақтарға қатысуды таңдасаң әрі қарай ол сабақтар онлайн форматта бола ма әлде барып оқыған дұрыс па сол жағын қарастыр. Егер өз бетіңше отырып, бар назарыңды сабаққа аударып, тиянақты дайындала аламын деп ойласаң онлайн түрде дайындалған абзал. Өйткені қосымшаға барып,келуге жұмсаған уақытты пайдалы өткізуге болады. Ал егер саған қатаң қадағалау қажет болса және бар назарыңды сабаққа аудару,үйде оқу қиындық туғызса оффлайн түрде оқыған жөн.

ҰБТ біздің өміріміздің мәні емес, оған аса қорқынышпен қарап, өз өміріңді тек дайындыққа алмастырма. Дайындықпен қатар ұйқың, жеке өмірің өз қалпында қалсын. Өйткені ұйықтамай, сабақтан басқа ешнәрсеге көңіл бөлмей, өзіңе демалыс бермей дайындалу сенің денсаулығыңа да, көңіл-күйіңе де кері әсерін тигізеді. Ал сабақ та оқып, уақытылы демалып та үлгеру үшін өзіңнің уақытыңды дұрыс пайдаланып, күніңді жоспарлап қой. Сонда бәріне уақыт табуға болады.

Үш ай дайындық барысында аз да болса түсінгенім осы. Кеңестерім қажетіңе жарайды деген үміттемін, замандас!

Анара Тұрсынәлі

13-орта мектептің 11-сынып оқушысы

Алматы облысы

Іле аудан