ҰЛТТЫҚ ҚҰНДЫЛЫҚ – БІРТҰТАС ТӘРБИЕ

Қазіргі заманғы мектепке дейінгі білім беру жүйесінде ұлттық құндылықтарды баланың санасына сіңіру – басты міндеттердің бірі. Қазақ халқының салт-дәстүрі, әдет-ғұрпы, тілі мен ділі – ұлттың болмысын айқындайтын асыл мұра. Осы мұраны мектепке дейінгі даярлық тобындағы балаларға түсінікті әрі қызықты түрде жеткізу – тәрбиешінің негізгі міндеттерінің бірі. Ұлттық құндылықтар – ұрпақтан-ұрпаққа жалғасқан тәрбие құралы. Олар бала бойында адамгершілік қасиеттерді дамытып, үлкенге құрмет, кішіге ізет, ата-ананы қадірлеу, туған жерді сүю секілді қасиеттерді қалыптастырады. Мектепке дейінгі даярлық тобындағы балалардың жас ерекшелігін ескере отырып, ұлттық құндылықтарды ойын арқылы, көркем шығармалар, ән-күй, қолөнер, салт-дәстүрлер арқылы таныстыру қажет. Мысалы, халық ертегілерін оқу арқылы балалардың ойлау қабілетін дамытып, жақсылық пен жамандықты ажыратуға үйретуге болады. Дәстүрлі ойындар (асық ату, арқан тарту, ақсүйек) арқылы ұйымшылдыққа баулуға болады. Қолөнермен айналысу (ою-өрнек салу, киіз үй макетін жасау) балалардың ұлттық мәдениетке деген қызығушылығын арттырады.

Баланың ұлттық құндылықтарды бойына сіңіруі үшін ата-аналар мен тәрбиешілердің өзара байланысы маңызды. Балабақшада немесе даярлық топтарында басталған тәрбие отбасында жалғасын табуы тиіс. Сол себепті ата-аналармен тығыз қарым-қатынас орнатып, ұлттық дәстүрлерді насихаттайтын шараларға оларды тарту қажет деп ойлаймын. Осы мақсатта, барлық іс-шараларға, апталықтарға ата-аналарды қатыстыруды ескеремін. Ұлттық құндылықтарды бала бойына сіңіру болашақ ұрпақтың рухани кемелденуіне, ұлттық сана-сезімінің қалыптасуына ықпал етеді. Мектепке дейінгі даярлық тобындағы тәрбие – ел болашағының берік іргетасы деп сеніммен айта аламын.

Қазақ халқының рухани мұрасын келер ұрпаққа жеткізу – әр тәрбиешінің парызы. “Ұрпақ тәрбиесі – ұлт болашағы” деген қағиданы ұстана отырып, әр бала жүрегіне ұлттық рухты сіңіре білейік!

Магауова Гулнур Кайратовна, «Ыбырай Алтынсарин атындағы жалпы білім беретін мектебі» КММ-сінің мектепалды даярлық тобы тәрбиешісі