«Ұлттық құндылықтарды бойына сіңірген жастар»

Ұлттық құндылықтар қасиетті халқымыздың ұлылығын айқындайтын асыл дүниелер. Сайын даланы ен жайлаған қазақ барлық игі бастамалардың негізін қалап кеткен-ді. Уақыт керуені ілгері жылжыған сайын адамзаттың ақыл-ойы озып кеткен жұрттың ортасында қазақ баласы жаһандық көшіне ілесе ала ма? Қалай? деген сұрақтар мені мазалайды.

Иә, ғасырлар қойнауынан қалыптасқан ұлт даналығы мен жаһандық жаңалықтардың бір арнаға тоғысқан кезеңі келіп жетті. Еліміз тәуелсіздігіне қол жеткізіп, еңсесін тіктеп алды. Бүгінгі күнде ел болудың қамы жасалуда. Еліміз де жеріміз де қазынаға бай. Мұнайы мен ураны, алтыны мен күмісі ешбір елдің қазынасынан кем түспейтін қазақ елі алпауыт елдермен иық тіресе алатын жағдайы бар. Қазақ баласының бойына үш түрлі маңызды қасиетті сіңіріп өсірген екен: олар – обал, сауап, ұят. Бір Димаштың ғана өзің алар болсақ, әлемдік сахнада тұрған сәттерінде тұла бойынан қазақылықтың өзін танығандай боламыз. Әлем сахнасында қазақ әнін әуелетіп, қазақша сөйлеуден және ұлтың дәріптеуден әсте жалыққан емес. Қазірде Димаш айтқан қазақ халық әндерін жарты әлем айтып жүрген болса қателеспес едім. Міне, ұлы даладағы аз халықтың жер-жаһанға атын шығарып, ұлттығын танытудың айқын көрінісі осы емес пе!

Туған жерінің тарихы мен мәдениетіне қанып өскен ұрпақтың өзін танып, өзгені танып оларға құрметпен қарағаны – бабаларымыздың тәрбиесі. Дүниенің «көрінетін һәм көрінбейтін сырларын» ұғуға талпынған жастар өзге тілді үйреніп Еуропада білімдерін шыңдап жатыр. Ұлттық тәрбиеден сусындаған саналы жастарымыз заманының заңғар талаптарына төтеп беріп, әлемдегі ең ірі Гарвард университеттерінің түлектері атануда. Қара басының қамынан гөрі ұлттық мүдде, ар-ұят, талап дейтін құндылықтарды бәрінен биік қойып жатқан жастарымыз аз емес. Барлық күш-жігерін, ғылыми әлеуетін ел игілігіне жұмсап жүргендер аз емес. Жусанның иісін Батыстың даңғаза тірлігіне айырбастаған жоқ. Мысалы, Шығыс Қазақстандық Сәкен Нұртазаев ауыл әкімі болса, қызылордалық Дәулет Қанашаев барлық білімін ұлттық мұнай компанияларының бірінде жұмыс істеуге арнап отыр. Бұлар – мыңның бірі. Меніңше, мұндай адамдар перзенттік парызын бәрінен жоғары қойып отыр.

Қорыта айтқанда, рухты жастар ғана ұлттық мүдде мен жаһандықтың ара-жігін ажыратып, бағамдай алады. Алаштың арда азаматы Әлихан Бөкейхановтың «Ұлтқа қызмет ету – көркем мінезден» деген сөздерімен ойымды түйіндегім келеді.