Әлеуметтік желі: заман айнасы ма, әлде тәуелділік тұзағы ма?

Бүгінде әлеуметтік желі қоғамның тынысын танытатын басты алаңға айналды. Таңертең көз ашқаннан бастап, кешкі ұйқыға кеткенге дейін телефоннан бас алмайтын әдет қалыптасты. Бірі жаңалықты осы жерден оқиды, бірі ойын ашық айтады, енді бірі өзін танытуға тырысады. Осылайша әлеуметтік желі ХХІ ғасыр адамының күнделікті серігіне айналды.

Әлеуметтік желінің пайдалы тұсы аз емес. Ол ақпарат таратуда жылдамдық пен ашықтықты қамтамасыз етті. Бұрын елге жетуі қиын болған жаңалық бүгінде санаулы секундта таралады. Қоғамдық мәселелер көтеріліп, әділетсіздікке қарсы үн естіледі. Жастар білім алып, кәсіп бастап, шығармашылығын дамытатын мүмкіндікке ие болды. Әлеуметтік желі талай таланттың жолын ашқаны да рас.

Алайда мәселенің екінші жағы да бар. Шектен тыс қолдану уақытты ұрлап, ойды бөлшектейді. Жалған ақпарат пен арзан танымалдыққа ұмтылу қоғамдық сананы әлсіретіп барады. Кейбір қолданушылар виртуалды өмірді шынайы өмірден жоғары қойып, өзгенің жылтыр өмірімен өзін салыстыруға бейім. Бұл – рухани шаршау мен сенімсіздікке апаратын қауіпті жол. Сондықтан әлеуметтік желіге біржақты баға беру қиын. Ол құрал. Қалай қолдансақ, сондай нәтиже береді. Саналы түрде пайдалансақ дамуға жол, бақылаусыз берілсек тәуелділікке апарады. Қоғам үшін ең маңыздысы – әлеуметтік желіні мақсатқа сай, жауапкершілікпен қолдану. Әлеуметтік желі қоғамдық пікірдің қалыптасуына тікелей әсер етіп отыр. Бір жазба мыңдаған адамның көзқарасын өзгерте алады. Бұл сөздің салмағы артқан заман.

Әр қолданушы кішігірім медиа, сол себепті жауапкершілік бұрынғыдан да маңызды.

Халел Досмұхамедов атындағы Атырау университеті Журналистика және қоғаммен байланыс кафедрасының 4-ші курс студенті

Талғат Гүлханым