Ақыл, қайрат, жүректі бірдей ұста.

Абай атамыз айтқандай, адам бойындағы қасиеттерді бір дәрежеде ұстай алсаң ғана, “Толық адам” боларың сөзсіз. Абай атамыздың бұл әңгімелерінің кім үшін болса да, тәрбиелік мәні зор. Әйтсе де білімге ұмтылушы жастар үшін айрықша құнды.

Бір сәт назар аударсақ, біздің қоғам ылғи болашағын көркейтуді, алдағы күнімізді жарқын етуді қалайды. Бірақ болашақтың әрбір сәті қазіргі уақыттың кірпішімен қаланады емес пе? Яғни, біз бүгінгіні толықтырсақ, дәл осы сәттің жарық кілтін тапсақ, болашақ та жарқын болары анық. Абай атамыздың отыз алтыншы қарасөзінде айтылған “ұят” ұғымы, он жетінші қарасөздегі “ақыл, қайрат, жүрек” сөздері әр адамның бойында табылар болса, “Мәңгілік Елдің” болашағына аландамасқа болар еді.

Жас мұраты, білім, тәлім-талабы…

Өнер, оқу-жастықтың қару жарағы,-деп І. Жансүгіров айтқандай, ата-бабамыз ел болып қалыптасу жолында оқу-білімнің орнын саралай отырып, оқуға, көруге шақырады. Өмір ақ пен қарадан, жаман мен жақсыдан тұратыны анық. Небір ортаға, небір адамдарға тап болуың ғажап емес. Алдыңнан небір қилы жолдар, ауыр тағдырлар шыққанымен мойымау керек. Ғабит Мүсірепов: “Мен жастарға: Алдарыңда таудай талап тұр. Өмір заңғарлары үнемі биікке шығарады. Оған жету үшін талмай ізденіңдер!-дер едім. Жастарға тоғышарлық, бойкүйездік дертінен аулақ, сергек, сезімтал болған жарасады” деген екен. Бізге тағдырмен қарсы шауып, таласып-тартысып, сәтсіздіктерге бой алдырмай өсу қажет. Мойындауымыз қажет, ұлы тұлғалардың сөзін оқи отыра, көңілімізде рух оянғандай сезілгенімен, тім әлсіз, сәтсіздіктерге кез болсақ, өзімізді тастап жіберуге дайын, ынжық ұрпақпыз. Мәнсіздік жайлап алған санадағы жаңғырықтан қашатынымыз сонша, кейбір қиындықтармен бетпе-бет келуге жасқанатынымыз бар. Ондай қорқыныштың артында сенің армандарың, сеннен үміт күтіп отырған елің, ең бастысы өзің тұрғаныңды ұмытпа, Ұлы даланың жасампаз ұрпақтары.

Ұлт тарихын зерделеп, ұлыс мүддесін асқақтату, Керей мен Жәнібектің, Абай мен Шәкәрімнің, Ахмет пен Міржақыптың сара жол, сарабдал билігін сақтау біздің қолда.