Астана – мәңгілік елдің Елордасы

Астана – мәңгілік елдің Елордасы

Астана - бүгінде Қазақстан жетістігі мен

жеңістерінің символы

Н.Ә.Назарбаев

Ия, дәл солай. Былтырғы жылы «ЭКСПО-2017» халықаралық мамандандырылған көрмесінде бүкіл әлем назарын өзіне аударған, сүйсіндірген, сүйдірген, тамсандырған, табындырған Астана небәрі жиырма жаста. Бұл, әрине, жас қала үшін үлкен жетістік екені даусыз. Бүгінде «Мәңгілік ел» атанған қазақ елін төрткүл дүниеге танытқан, танытып қана қоймай мойындатқан осы Астана жайлы сөз қозғамақпын бүгін.

Тарихқа көз жүгіртсек, Сарыарқаның төсінде орналасқан Астана ұлы Алаштың тоғызыншы астанасы екен. Ғасырлар тоғысында ерке Есілдің бойынан осындай әсем қаланың бой көтеруі – Елбасымыз Нұрсұлтан Әбішұлы Назарбаевтың көрегендігін тағы да бір рет дәлелдегендей. Жаныңызға не керектің бәрі осында. Жер бетіндегі сұлулық атаулы осында шоғырланған дерсің. Сарыарқаның төсінде орналасқан Астана нағыз жасампаздықтың жемісі. Әсем безендірілген гүлзарлар мен субұрқақтар, биік-биік ғимараттар көздің жауын алардай тамаша көріністер. Осы көрініс мәңгілік еліміз секілді мәңгі осылай әдемі кейпінде тұра берсе екен. Біз әрқашанда Астанамызды мақтан тұтамыз.

Бүгінгі тәуелсіз еліміздің тапжылмас тұғырына айналған Астанаға жолыңыз түсіп барып жатсаңыз, өзіңізге рухани азық аларыңыз сөзсіз. Шығармашыл адамдардың шабытын шарықтатары да ақиқат. Дегенмен, барлық жанға мұндай бақыт бұйыра береді ме екен?

Жоқ, әрине. Менің ойымша, мектеп оқушылары мен студенттерге, нақтырақ, жыл бойына жақсы көрсеткіш көрсеткендерге жаз айында тегін жолдамалар беріліп жатса, олар да ұшар биікке өрмелеген қыран құстай білім көгіне ұмтылар еді. Астананың әсем жерлерін аралап көріп шыққан әрбір жан екінші рет сонда қайта баруға құштар болып тұрады. Ендеше, Астана құшағыңды жай, мен келемін.

Сөз соңында:

Бой көтерген солтүстіктен жас қалам,

Бүкіл әлем назарында Астанам.

Киелі Түркістаннан, оңтүстіктен

Арнадым бір ауыз сөз, жыр саған,-

деп Астананың қазақ елі болашағының қаласы, тәуелсіздігіміздің ордасы екендігін тағы да бір айтқым келіп отыр.