БІЛІМ БЕРУ САПАСЫН АРТТЫРУДЫҢ ИННОВАЦИЯЛЫҚ ТӘСІЛДЕРІ

            Бүгінде мен шатқалы мен шытырманы, соқпағы мен торабы мол жолдың жолаушысына айналып, ұстаздықтың ұзақ сапарындамын. Ондағы мақсатым – ұлтым  мен оның болашағы үшін алаңдағаным, адал қызмет еткім келетіндігі. Ұраным: Мектептің жаны – мұғалім. Мұғалім қандай болса, мектеп сондай болмақ. Адам бір жылын ойласа – дән себеді, бар ғұмырын ойласа – ағаш отырғызады, ал ғасырлық болашағын ойласа – ұрпақ  тәрбиелейді. Иә, расымен ақылдың кені болған бабалар сөзі тегін айтылмаған болса керек. Оқушыларды тәрбиелеуде, білім беруде  ұрпақтың болашағы мен тәрбиесі үшін ұстаздың жауапкершілігі мен еңбегі зор екені даусыз.

            Ендеше, қазіргі таңда білім  беру сапасын арттырудың инновациялық тәсілдері қандай?

            Еліміз Еуразиялық аймаққа кіріп, ХХІ ғасырға аяқ басқалы елбасының «Қазақстан – 2030» атты стратегиялық бағдарламасына сәйкес жаңа техника мен технология процестерінің дамуы келешекте білім ордаларында білім беру қандай бағытта өрбуі керек деген өзекті мәселе туғызып, сол мәселені реттеу барысында бірнеше қадамдар жасады. «Білімді мыңды жығар» демекші, әлемдегі алпауыт мемлекеттердің қатарына ену үшін ең алғашқы қадам білім саласынан басталады десек болады. Оған дәлел орта мектепте білім мазмұнының жаңаруы, жаңашылдыққа сай жаңашыл кадрлардың дайындалуы, бір сөзбен айтқанда, инновациялық білім жүйесінің қалыптасуы. Инновациялық білім беру жүйесі «Адам – қоғам – табиғат» арасындағы үйлесімділікті жаңаша қалыптастыратын дүниетану үрдісіне көзқарас өзгеріп, оқушының ойлау жүйесін мәдениетті тұрғыдан жетілдіру; білім берудің әдісі мен мазмұнын оқушының іскерлік, жігерлілік қабілетін және жаңашылдық қасиеттерін қалыптастыратын әдіснамалық әдістерге бағыттау; пәндерді оқыту барысында адамның рухани байлығына, өнегелілігіне, істеген ісіне әлеуметтік жауапкершілікпен қарауына көңіл бөлу; оқушының алған ғылыми білімін, оның әлеуметтік тұрмысын іскерлік қабілетімен ұштастыра қарастыру. Тұтастай алғанда жаңашылдық көзқарас қалыптастыруды талап етеді. 

Алайда, менің байқауымша, білім беруде түрлі әдіс-тәсілдерді немесе платформаларды бір сабақта көп қолданамыз. Бұл педагогтің өз сабағында жаңаны көрсетем деп жоғарыда аталған үйлесімділікті ұмытқанды көрсетеді. Десекте, көш жүре бара түзіледі деген сенімдемін.

             Қорыта айтқанда, Жүсіпбек Аймауытовтың мына бір сөзін де көңілімізге түйсек: «Сабақ беру үйреншікті жай шеберлік емес, ол үнемі жаңадан жаңаны табатын өнер». Сондықтанда, құрметті ұстаздар қауымы, білім беру сапасын арттыру жолында жаңадан жаңаны таба білейік.