Цифрлық сауаттылықты дамытудағы мобилографияның рөлі

Цифрлық сауаттылықты дамытудағы мобилографияның рөлі

Қазіргі қоғамда цифрлық сауаттылық әрбір адам үшін негізгі дағдылардың біріне айналды. Ақпаратты табу, өңдеу, тарату және сыни тұрғыдан бағалау қабілеті оқушылардың болашағына тікелей әсер етеді. Осы тұрғыдан алғанда, мобилография яғни, смартфон арқылы фото және видео түсіру тек шығармашылық құрал ғана емес, сонымен қатар цифрлық сауаттылықты дамытудың тиімді жолы болып табылады.

Ең алдымен, мобилография үйірмесінде оқушыларға технологияны саналы қолдануға үйретеді. Көп жағдайда жастар смартфонды тек ойын-сауық үшін пайдаланса, үйірме аясында олар оны пайдалы құралға айналдырады. Фото немесе видео түсіру барысында оқушы камера баптауларын меңгереді, жарық пен композицияны ескереді, осы арқылы оқушы бойында техникалық сауаттылықтың қалыптасуына ықпал ете аламыз.

Сонымен қатар, мобилография ақпаратпен жұмыс істеу дағдыларын жетілдіреді. Оқушылар белгілі бір тақырыпқа контент дайындау үшін мәлімет іздейді, оны саралайды, маңыздысын іріктейді. Бұл процесте олар ақпараттың шынайылығын тексеруді, жалған деректерден сақтануды үйрену нәтижесінде сыни ойлау қабілетін дамытады.

Тағы бір маңызды қыры – цифрлық коммуникация. Түсірілген материалды өңдеп, оны әлеуметтік желілерде жариялау барысында оқушылар аудиториямен байланыс орнатуды, пікір алмасуды, өз ойын дұрыс жеткізуді меңгереді. Бұл қазіргі медиакеңістікте аса қажет қабілеттердің бірі.

Дегенмен, мобилографияны үйрету барысында қауіпсіздік пен этика мәселелерін де назардан тыс қалдыруға болмайды. Авторлық құқықты сақтау, жеке өмірге құрметпен қарау, әлеуметтік желідегі мәдениеттілік цифрлық сауаттылықтың ажырамас бөлігі.

Мобилография – оқушылардың цифрлық сауаттылығын жан-жақты дамытатын заманауи өнер. Ол техникалық білімді, сыни ойлауды, коммуникацияны және шығармашылықты қатар жетілдіреді. Сондықтан білім беру жүйесінде мобилографияны тиімді пайдалану – уақыт талабы.

Мұхан Абайхан

«Сыр жұлдыздары» балалар мен жасөспірімдерге арналған шығармашылық және инновация академиясы» қосымша білім беру орталығы