Есірткісіз қоғам-еңселі ел ертеңі

Есірткісіз қоғам-еңселі ел ертеңі

Есірткі...Бұл сөз көпшілікке таныс жай сөз болып көрінуі мүмкін,алайда қатері мол,тамырын тереңге жайған індет,болашақты бұлыңғыр ететін қасірет.

Есірткі – тек денсаулықты емес, сана-сезімді де құртатын, қоғамды кері тартатын дерт. Ал қоғам қандай болуы керек? Бүгінгі қоғамның жағдайы қалай көрініс табады? Қазірде қоғам жақсы дамып,жан-жақты өркендеуде,алайда кейбір зиянды әдеттермен де күресіп жатқанын да жасыра алмаймыз.Соның бірі ел арасында,әсіресе жастардың көбісінің қызығып,теріс жолға түсуіне себеп болып жатқан жағдай есірткінің көп таралуы. Бұл індеттің жастардың ертеңіне үлкен қауіп төндіретінін,өмірінің бір сәтте өзгеріп құрдымға кететіні туралы қаншама жастарға түсіндіру жұмыстары жүргізіліп жатыр.Жастарды бұл дерттен аулақ ұстау,ертеңгі келешектің кепілі. Сондықтан «Ел боламын десең, бесігіңді түзе» деген қазақтың өнегелі сөзі есірткіге қарсы күрес тақырыбының өзегін айшықтайды.

Қоғамның ең асыл қазынасы – жас ұрпақ. Олардың өмірінің әр сәті білімге, өнерге және жарқын болашаққа талпыныспен өрнектелуі тиіс. Есірткіге әуестік – бұл саналы ұрпақтың санасына түсер қара бұлт, ал оның алдын алу – баршамыздың басты міндетіміз. Бұл міндетті ең бірінші отбасы өзіне жүктейді.Баланың шыр етіп дүниеге келген сәтінен бастап,оның тура жолға түсіп,толық адам болып кетуіне жәрдем беретін ата-ана.Есірткімен еленгісі келіп,сол нәрседен өзіне жұбаныш табатын жастар да болуы ықтимал, олар өз отбасынан алмаған жылулықты,көңілді сол нәрседен табамын деп ойлауы да жасөсіпірім шақта заңдылық десек қателеспейміз,сондықтан балаға көңілді кішкентай кезінде ғана емес,нағыз өмір жолына түсер уақытта қолдау көрсетіп,мейірім мен жылулықты екі есе беруіміз керек. Бала көңіліне демеуді есірткіден емес,өз отбасынан алуы қажет,әр отбасыда осындай қағида болса,ол отбасынан шыққан бала теріс жолға түспейді. Баланың тәрбиесіне ықпал ететін жанында жүрген адамдар. «Адамның қандай екенін білгің келсе,досына қара» деген ел арасында айтылған сөздің үлкен мәні бар.Баланың жақсы болып өсуі өскен ортасына байланысты,білімге құштар ортада өскен бала есірткіге әуес болмайды,бұл ойды өмір тәжірибесінен көре аламыз. Үшінші бір тәрбие беретін орта -білім ордасы. Қазіргі уақытта мектебемізде есірткінің зияны,оның адам өміріне әсері туралы сынып сағаттар,түрлі шаралап,қойылымдар,әртүрлі байқаулар өтіп жатыр.Бұлардың барлығының мақсаты бір-баланың есірткіден аулақ болып,жарқын өмір сүруі.Міне мұның бәрі оқушы үшін тәрбиенің қайнар көзі. Қорытындылай келе Абай айтқандай, «Өзіңе сен, өзіңді алып шығар, еңбегің мен ақылың екі жақтап», әр адам саналы түрде өз өміріне жауапкершілікпен қарап, есірткінің құрбаны болудан сақтануы қажет.Сонда ғана қоғам сау,ұрпақ салауатты болады.

Мақала жазған: № 100 орта мектебінің 10-сынып оқушысы

Нұрлыбекқызы Ұлболсын

Жетекшісі:қазақ тілі мен әдебиеті пәні мұғалімі Ұзақбаева Ақнұр Тұрғабылқызы