«Данашым» физика-математика мектебінің

Қазақ тілі мен әдебиеті пәнінің мұғалімі Қ.Б. Абирова

Наурыз – жыл басы!

Наурыз айының 18 жұлдызында Алматы қаласы, Медеу ауданы, «Данашым» физика-математика мектебінде «Наурыз – жыл басы!» атты мерекелік іс-шара өтті. Концерттік бағдарламаны аталған мектептің орыс тілі мен әдебиеті пәнінің мұғалімі З.М. Раиспаева мен қазақ тілі мен әдебиеті пәнінің мұғалімі Қ.Б. Абирова ұйымдастырды. Қатысушы сыныптар 5-қазақ-орыс сыныбы болды. Концерттік бағдарлама басынан-аяғына дейін қазақ тілінде жүргізілді.

Мерекелік іс-шара жас ұрпаққа тәрбиелік мәні бар мағыналы көріністен басталды. Көктем шығып, бар тіршілік жанданданған әсем видео роликтің негізінде сахна сыртындағы алғашқы сөзден соң, ортаға Күн мен Айдың рөлінде Халел мен Лаура сөздерін нақышына келтіріп орындады, ортасына Ұмай ана келіп қосылып, көріністің көркін келтірді. Қазақ халқы төрт түлікті ерекше әспеттеген, сондықтан төрт түліктің пірлері ортаға шығып келген жылға өз ықыластарын білдіреді. Ең соңында Қыдыр ата барша жұртқа өз батасын беріп, мерекелік шараны бастап береді.

Концертіміздің беташарында Абылай күмбірлеген «Адай» күйін шеберлікпен орындап, көрерменге тарту етті. Мерекелік іс-шараны тізгіндеген Берік Айсұлтан мен Пиантковская Сафия көрерменнің ыстық ықыласына бөленді. Балалар «Жетіген», «Балбырауын» биін билеп, қыздар Маржан Арапбаеваның орындауындағы «Тек алға» әнін билеп, шырқап берді. Жігіттер қауымы «Қазағымның дәстүлері-ай!» әнін нақышына келтіре айтып, көрерменді бір марқайтты.

«Нағыз қазақ қазақ емес, нағыз қазақ – домбыра» демекші, концерттік бағдарламамыздың абыройын арттырып, мерейін көтерген бір сәт – Темірбек Жүргенов атындағы Қазақ Ұлттық Өнер академиясының магистранты, драматург Мырзабек Нәсіпханұлының қоңыр әуені мен домбырының қоңыр үнінің ерекше үйлесімі нәтижесінде орындалған қазақ әндері, тыңдаушы қауымды өзіне елітіп, ерекше мерекелік күйге бөледі.

Концерттік бағдарламамыз Елемес Бейбарыс пен Жанболат Арланның орындауындағы «Батырлар ұраны» әнімен өз мәресіне жетті. Мерекелік іс-шараға қатысқан барлық қатысушылар Көк Туды ортаға алып шықты. Әнді ерекше сезіне білген, екі жігіттің өнері барша жиналған қауымның рухын оятып жібергендей әсерде болды. Барша көрермен орындарынан тік тұрып, қол шапалақтап, қошемет көрсетті.

Мерекелік іс-шараның қортынды бөлімінде мектеп диеректоры қортынды сөз айтып, қуаныш шашуын шашты. Концерт соңында мерекелік іс-шарадан әсерленген ата-аналар өз алғысын білдіріп, құттықтау сөздерін айтып жатты. Ерекше айта кететін жайт, орыс сыныбындағы оқушылардың қазақ тілінде таза өлең оқып, әнді нақышына келтіріп орындауы, көріністі тұла бойынан өткізіп сезінуі – ата-ананың мектепке деген ықыласын ұлғайтып, жас ұрпақтың ертеңіне деген сенімін арттыра түсті.

Осылайша, «Данашым» физика-математика мектебінде Наурыз мерекесі ерекше тойланды.