ЖАҢҒЫРУ ЖОЛЫНДАҒЫ ЖАС МАМАНЭССЕ
Ұстаздық мамандығының орны қай заманда да, қай қоғам да айтарлықтай бет-беделге ие болып отырған. Осы бір қиындығы мен қызығы қатар жүретін мамандық иелерінің арқасындағы артылған жүгі мен міндеті жаралғалы ұшан-теңіз болған. Ұстаздық мамандығын, осы кәсіп иелерінің талабы мен жауапкершілігін сезінбеген, түсінбегендер ғана шын мәнінде байыбына бара алмайды. Менің ойымша, аспан асты, жер үсті мамандық иелерінің ішіндегі ең бір күрделісі де, қуаттысы да аталған ұстаздық екеніне дау жоқ шығар! Иә, ұстаздықтан артық ұлы нәрсе бұл дүниеде жоқ деп өз басым анық айтамын. Ұрпақ жолында бойындағы барша күш-қуатын сарқып береді қашанда. Болмысы бөлек, қыран іспетті ерекше жаратылыс иелерінің өмірдегі алар орыны қай заманда да жоғары болған. “Күн астында ұстаздықтан ұлы нәрсе жоқ”-деп К.Д Ушиниский айқтандай бұл мамандық өзгелерден дара, басқалардан оқшау. Мен де кешегі Әл Фараби, Абай, Ыбырай, Ахметтер салған ұстаздық жолдан жаңылмай өтіп, қазақ баласына талмай тәлім беріп, бойымдағы білім нәрін бағыштағым келеді өл-өлгенше. Қазақ тарихына көз салсақ кешегі ұлағатты да , ағартушы-ғалым ұстаздардан қалған сара жол бүгінде өз сүрлеуінен жаңылмай, күн санап, ілгері басып келе жатқанын анық байқаймыз. Қазіргі замандағы ұстазға қойылған талап пен міндет өте зор. Білгеніңді басқаға үйретіп, одан қуат алып, өзің сүйген ісіңді жасағанға не жетер дейсіз? Өткен жылы жарияланған Елбасының "Болашаққа бағдар: рухани жаңғыру" мақаласында осы ұстаздар туралы да көп ой қозғаған болатын. "Жаңа ғасыр, жаңа заман талабына сай ұстаздар да үнемі даму үстінде болу керек" дегенді баса айтқан. Менің ұғымымда, жаңғыру-тамыр,талғамнан, салт-санадан ажырау емес, жаңа технологияны меңгердік деп, бас-көзсіз өткенді ұмыту да емес, екі жақты болу керек. Осы тұрғыдан келгенде мұғалімге, оның ішіндеге жас мамандар басты рөл атқармақ. Қазірге жас мамандар-жаңашыл, білімді, педогогикалық өзгерістерге бейім, жан-жақты деп айтуға тұрарлық. Жас мамандар өткеннің қалдығын емес, өзінше ой толғайтын, болашақтың таң нұрын бағыштайтын айтулы жандар. Қазіргі жаңа бағдарлама, жаңа жүйе, жаңа технология заманында жастар алдымен көш бастап, осы жолда еңбек етіп келе жатқандары аз емес. Мемлекет тегін оқытқан соң, саналы түрде қайтарымын ойлап, өзіне де , басқаға да пайдасын тигізген жас мамандар көзге түсіп жүргендері көңіл қуантады. Сол жастардың қатарында өзім де бар екенімді аса бір мақтаныш сезімімен айтқым келеді. Ендеше, сол жайында таға да молынан ақтарып, сөзімді жалғастырайын. Алдымен Мен де осы мамандыққа қалай кез болып, қалай таңдағаным жайлы сыр шертсем деп едім. Қазақы қанына тағылым мен талғам дарыған, тамыры ұлттың жан байлығымен бітіскен ауыл баласының ұстаздықты таңдамауы мүмкін емес шығар! Маған да көз ашып көрген даланың ұстаздары-атам мен әжем, көне көздердің тәлімі орасан көп тиді десем артық айтқандық емес. Мектеп қабырғасында да талай ұлағатты ұстаздар көріп, білімі мен тәрбиесін қатар бойға сіңірген мына біздерге мұғалім болмағанда не қалды дерсіз? Осы бір даланың төл тума перзенттері іспеттес мамандық иелерінің алдында қашан да қарыздар екенімді, олардың берген бағыт-бағдары арқылы осы күнге жеткенімді үнемі еске алып, мақтанышпен айтамын. Осындай жаны құт, жүрегі мейірбан мамандық иесі болуға менің де қақым бар екенін, шама-шарқым да жететінін сезініп, түйсінген соң, Құдай қолда деп жоғарғы оқу орнына тапсырғаным сол еді. Атап айтқанда, Семей мемлекеттік педагогикалық инситутының, қазақ филологиясы факультетін төрт жыл оқып тәмәмдап, осы бір жаны таза адамдардың қатарында жүрген жайым бар. Енді осы мамандық иесі аталған маған жұмысқа қалай келуім жайлы кеңінен толғап, баяндай кетуді жөн көріп отырмын. Оқуды өте жақсымен аяқтаған маған ал дегенде дайын жұмыс табыла қоймады. Ақыры 2014 жылдық наурызында қалаға қарасты Жарқын ауылдық мектебінде қазақ тілі мен әдебиеті пәнінің мұғалімі болып жарты жыл уақытша қызыметке тұрдым. Неге? Уақытша дейсіз бе? Себебі, мынандай: Қазір ұстаздық мамандығын даярлайтын оқу орындары көп. Соның ішінде қазақ тілі мен әдебиеті мамандығын меңгергендер өте көп.Сондықтан аталған мамандық иелеріне жұмыс тапшы болуда. Мен де соның бірі болдым. Аталған ауылда қазақ тілі мұғалімі декреттік демалысқа шығып, мен сондықтан уақытша істеген едім. Енді жұмыстан шығып, тағы да біршама уақыт ұстаздық құдіретін сезіне алмай жүрдім. 2015 жылдың қаңтарында СҚО, Ақжар аудандық мектебінде тағы та мамандық бір жылдай істеп, жоғарыда атап өткендей тағы да жұмыссыз қалдым. Осы бос уақыт ішінде күн көру үшін әр түрлі жұмыстар істеп жүрдім. Кейін Семей қаласында жарық көретін республикалық ұстаздар газеті "Ақжолтай" газетінде тілші болып қызымет жасадым. Ұстаз болмасам да, "бір терінің пұшпағы " ғой деп сол ұстаздардың шығармашылығын шығарып, өзімді шабыттандырып едім. Газетте мен ойлағандай ұзақ уақыт жұмыс жасай алмадым. Қала сыртындағы ауылымнан қатынау қолайсыз еді, әрі беделді басылым болғанымен, мардымды қаражат шыға қоймайтын. Осылай жүріп, от басын құрған маған енді тіпті қиындау болды. Интернет арқылы Павлодар облысының, Озерный ауылында бос орын бар екенін біліп, сол елді мекенде нақты бір жыл істеп елге қайттым. Өйткені, ауылда бала саны мүлдем аз еді, аудан орталығына шалғай болатын. Ақыры орта мектеп қысқарып, тоғыз жылдық болды да шыға келді. Менен басқа да адамдар қоныс аударып, тіршіліктің қамына кірісті. "Ат айналып қазығын табар" демекші, Семейіме оралған соң мен қалалық білім бөлімі арқылы қала маңындағы ауылдық мектепте бос орын бар екенін біліп мамандық бойынша қызыметке тұрдым. Ол, ол ма? Мен дипломмен ауылға бағдарламасы бойынша аталған ауылдан үй алып, жолдасым екеуіміздің қуанышымыз еселенгенін жасырмаймын. Мен қазір Прииртышcкий ауылы, Біржан Исадилов атындағы орта білім беретін мектебінің қазақ тілі мен әдебиеті пәнінің ұстазымын, сынып жетекшісімін. Маған осы жолда маған үлкен қолдау көрсетіп, үй алуға көп көмегін тигізген мектеп директоры Ақылбек Шакарұлына, мектеп ұжымына алғысым шексіз деп айта аламын. Жас болсам да,азды-көпті көргендерім маған ой салды. Осы жолға жетудегі менің сабырым мен мамандығыма деген кеудеде тұнған махаббатым басты жеңісім болды. Ия, алдыға мақсат, қойған адам ұтылмасы анық. Ұстазық-деген ұлы ұғым ғой. Таяуда ғана халыққа жол тартқан "Төртінші өнеркәсіптік революция жағдайындағы дамудың жаңа мүмкіндіктері" атты Елбасының кезекті жолдауындағы он міндеттің жетінші міндеті тұтастай осы ұстаздар туралы, оларға артылар міндет пен қоғам алдындағы еңбегі екендігін барлығымыз көрдік, сараладық. Жаңа бағдарлама, жаңа ұстаздар қазақ елінің одан әрі өсіп, кемелденуіне жол ашады деп ойлаймын. Қазіргі ұстаздар жан-жақты, технологияларды меңгерген білімпаз жандар. Сондықтан құрмет те, міндет те жоғары болмақ.Осындай өлмейтін, өшпейтін мамандық иесі болу мен үшін де зор ғанибет. Қазақ баласына, ұлт ұрпағына бойымдағы барымды бере білсем менің де сол аңсаған арманым. Сөз соңында айтарым "Алты Алаштың басын қосса, төр мұғалімдікі" деген Мағжан Жұмабаевтың сөзі әрқашан санада. Қазақ барда, ел барда, жер барда ұстаздық мамандық әлемге нұрын шашып мәңгілік күндей жарқырай бермек ! Жаңғыру жолындағы жалынды еңбегіміз дәл қазіргідей құпталып, өрісіміз кеңейе берсін деген ой айтамын. Осы жолдағы сапарымыз оң болып, Жаратқан әр басқан қадамдарымызды құтты қылсын!
Ұстазбын жұмысым мен бас панам бар,Ұрпаққа білім беріп, тастағам нәр.Жағдайың жұртың барда жаман болмас,Жаңғыру жолындағы жас мамандар.
ШАКИМАРДАН НҰРБОЛАТ
16 Қырқүйек 2018
1562
3 рет жүктелген
Дайын ҚМЖ. Барлық пәндерден 2022-2023 оқу жылына, жаңа бұйрыққа сай жасалған