Жастармен жұмыс – болашаққа бағыт: өндірістік тәжірибемнің жарқын белесі

Қазіргі әлемде білім беру тек теориямен шектеліп қалмай, студенттерге нақты тәжірибе алаңын ұсынуға бағытталған. Университет қабырғасынан алған теориялық білімді практикада жүзеге асыру – кәсіби қалыптасудың алғашқы әрі маңызды кезеңі. Осы орайда менің жастар саясаты саласында өткен өндірістік тәжірибем – өзіме де, болашақ мамандығыма да жаңа көзқарас қалыптастырған мазмұнды әрі шабыттандыратын уақыт болды. Қазіргі қоғамда жастар саясаты – елдің болашағын қалыптастыратын маңызды стратегиялық бағыттардың бірі. Жастар – жаңашылдықтың, креативті ойлаудың, әлеуметтік белсенділіктің қайнар көзі. Осы орайда жастар саясаты орталықтары — тек іс-шаралар ұйымдастыратын құрылымдар ғана емес, тұлға дамуы мен азаматтық жауапкершілікті қатар тәрбиелейтін орта ретінде ерекшеленеді.

02 маусым күні біз жастар саясаты орталығына алғаш аяқ бастық. Алғашқы күні орталықтың жетекшісімен және жұмыс жоспарымен танысып, алдағы іс-шаралар күнтізбесін бірлесіп талқыладық. Жастармен жұмыс істеудің маңызы, орталықтың күнделікті атқаратын қызметтері, жалпы құрылымы мен миссиясы таныстырылды. Бұл орталық – тек ұйымдастырушылық мекеме ғана емес, жас буынның рухани, мәдени және әлеуметтік дамуына тікелей ықпал ететін кеңістік екені анық сезілді.

Бірінші өткізген іс-шарамыз – «Өз эмоцияңды тану» тақырыбына арналды. Тақырып заманауи жастар үшін аса өзекті. Эмоциялық интеллектті дамыту, стресс пен күйзеліс жағдайларын реттеу, өзін-өзі түсіну сынды дағдылар кез келген адам үшін маңызды. Біз іс-шараға арнайы сценарий жазып, дизайн және интерактив форматын ойластырдық. Танымал MBTI тестін қолдану арқылы қатысушылардың қызығушылығын арттырдық. Қонақ ретінде ҚазҰУ-дың мәдениеттану кафедрасының оқытушысы Айжан Нурхамитқызын шақырдық – бұл да іс-шараның ғылыми және практикалық маңызын тереңдете түсті. Жастармен ашық диалог орнату, пікір алмасу, сезімді еркін жеткізу және топтық белсенділік – мұның бәрі біздің кәсіби әрі тұлғалық дамуға бағытталған алғашқы тәжірибеміз болды. Сонымен қатар, жоспарланған жобаларымыздың бірі – ұлттық музыка мен қазіргі мәдени ағымның тоғысуы ретінде танымал Spirit of Tengri этно-фьюжн фестиваліне қатысу болды. Бұл іс-шараның біз үшін маңызы зор: музыка – ұлттың жан дүниесі, ал оны заманауи форматта ұсыну – дәстүр мен технологияны байланыстыратын көпір. Фестиваль тек концерт қана емес, мәдени мұраны жаңғырту, ұлттық музыканы әлемдік деңгейге көтеру және жастар арасында рухани қызығушылықты ояту алаңы екенін көзімізбен көрдік. Артынша есеп тапсырдық, фото-видео материалдар жинадық, алған әсерімізбен бөлістік.

Жастармен мәдени-ағартушылық бағыттағы жобалар ұйымдастырумен қатар, медиа сауаттылық тақырыбындағы лекцияларға да қатыстық. Бұл бізге фейк ақпаратты ажырату, сенімді дереккөздерді пайдалану және әлеуметтік желі арқылы қоғамға оң әсер ету жолдарын меңгеруге көмектесті. 20 маусым – өндірістік тәжірибемнің соңғы күні. Артқа қарасам, бұл тек тәжірибе емес, өзімді кәсіби ортада сынаған, ішкі әлеуетімді таныған, болашақ мамандығымды сезінген ерекше кезең болды. Командалық жұмыс, креатив, жауапкершілік, уақытыңды тиімді жоспарлау – бәрі-бәрі өз орнын тапты.

Жастар саясаты орталықтарының күнделікті жұмысы көпқырлы. Олар әлеуметтік жобаларды жоспарлаумен қатар, тренингтер, семинарлар, ашық кездесулер ұйымдастырады, волонтерлік бастамаларға қолдау көрсетеді, түрлі форумдар мен мәдени іс-шараларға дәнекер болады. Бұл – жастардың тек тыңдаушы ғана емес, идея ұсынушы әрі оны іске асырушы болуына жол ашады. Әр жоба — тек тәжірибе емес, жас ұрпақтың ішкі әлемін дамыту мен қоғамға бейімделуінің нақты қадамы. Сонымен қатар, жастар саясаты саласы – ұдайы жаңарып, заман сұранысына бейімделіп отыратын жүйе. Цифрлық медиа, инклюзия, экологиялық сананы қалыптастыру, креативті индустрия, еріктілер қозғалысы, тіл мен мәдени мұра – осының бәрі бүгінгі жастармен жұмыс істейтін құрылымдардың күн тәртібінде. Жастар саясаты – бұл болашаққа салынған инвестиция. Ал осы саладағы тәжірибе – менің кәсіби тұлғамның іргетасы. Бұл тәжірибенің арқасында мен тек білікті маман болуға емес, өз қоғамымның белсенді әрі саналы мүшесі болуға ұмтыламын.

Орындаған: Ерғали А.М

Жетекші: Кудерина А.Н

#мәдениеттану #КазНу #Философияжәнесаясаттану

https://farabi.university/