Жастармен жұмыс – болашаққа бастар жол

Нұрмұхамбетова Қымбат

Мәдениеттану мамандығының 2 курс студенті

Өндірістік тәжірибе барысында ustaz.tilegi сайтына мақаламды жарияладым.

«Жастармен жұмыс – болашаққа бастар жол»

Қазақстанның болашағы – бүгінгі жас ұрпақтың қолында. Ел ертеңінің жарқын болуы жастардың жан-жақты дамуына, олардың әлеуетін ашуға және қоғамдағы белсенділігін арттыруға тікелей байланысты. Осы маңызды миссияны жүзеге асыру жолында мемлекеттік деңгейде жүйелі жұмыстар атқарылып келеді. Соның айқын үлгісі – Алматы қаласы Жастар саясаты басқармасы.

Алматы қаласы Жастар саясаты басқармасы – қаланың жастарына бағытталған мемлекеттік бағдарламаларды іске асырушы негізгі орган. Басқарманың басты мақсаты – жастарды қолдау, олардың әлеуметтік, экономикалық, рухани және кәсіби дамуына жағдай жасау. Басқарма еліміздегі «Жастар саясаты туралы» Заңды басшылыққа ала отырып, Алматы қаласында жастар саясатын дамыту бағытында нақты жобалар мен кешенді іс-шаралар жүргізеді. Оның ішінде: Жастардың қоғамдық белсенділігін арттыру; Жастардың кәсіпкерлік бастамаларына жағдай жасау; Студенттік өзін-өзі басқару ұйымдарымен жұмыс жүргізу; Патриоттық тәрбие мен ұлттық құндылықтарды насихаттау. Сонымен қатар, басқарма жастар арасындағы өзекті мәселелер – жұмыссыздық, тұрғын үй, білім алу, мәдени ортаға бейімделу сияқты бағыттарда нақты шешімдер ұсынып, түрлі мемлекеттік қолдау тетіктерін үйлестіреді. Жыл сайын түрлі форумдар, тренингтер, фестивальдер мен әлеуметтік жобалар жүзеге асырылып отырады.

Жеке тәжірибем: білім мен шабыттың тоғысуы

Алматы қаласы Жастар саясаты басқармасындағы өндірістік тәжірибе мен үшін кәсіби тұрғыдан ғана емес, адами тұрғыдан да үлкен тәжірибе болды. Мен тек әкімшілік жұмысқа араласып қана қоймай, жастармен жұмыс істеудің нақты әдістерін, жоспарлау мен ұйымдастырудың маңызды қырларын меңгердім. Басқарма ұйымдастыратын іс-шаралардан – жастар форумдары, семинарлар, әлеуметтік жобалардан – шабыт алдым. Күн сайын ұжыммен бірлесіп жұмыс істеу, пікір алмасу мен өз ойымды еркін жеткізу дағдыларым арта түсті. Маған сенім білдіріп, жауапты тапсырмалар жүктелуі – өзімді кәсіби маман ретінде сезінуге ықпал етті.

Алматы қаласы Жастар саясаты басқармасы – идея мен жасампаздықтың орталығы. Бұл мекемеде тәжірибеден өту арқылы мен еліміздегі жастар саясатының қаншалықты маңызды екенін және оның шынайы нәтижелерге бағытталғанын сезіндім. Ең бастысы – бұл тәжірибе менің болашақ мамандығымды саналы таңдауыма әсер етті. Қоғамдағы белсенді, жауапкершілігі мол азамат болып қалыптасуға үлкен серпін берді. Жастармен жұмыс – бұл жай қызмет емес, бұл – ел болашағы.