Жазғы демалыс-жарқын әсерлер мекені

Жазғы демалыс – жарқын әсерлер мекені

Алматы қаласы Алатау ауданы №196 жалпы білім беретін мектепте 2026 жылдың 1 маусым күні балалардың жазғы демалысын тиімді ұйымдастыру, олардың шығармашылық және танымдық қабілеттерін дамыту мақсатында «ЭТНО Kids» жазғы алаңының салтанатты ашылуы өтті. Ашылу рәсімі Балаларды қорғау күні мерекесімен тұспа-тұс келіп, балаларға көтеріңкі көңіл-күй мен ұмытылмас әсер сыйлады.

Мектеп ауласында ұйымдастырылған мерекелік іс-шараға барлығы 300 оқушы қатысты. Ашылу барысында ұйымдастырушылар мен топ жетекшілер өз міндеттерін жоғары жауапкершілікпен атқарып, балалардың қауіпсіздігі мен белсенді демалысын қамтамасыз етті.

Бағдарлама аясында оқушылар үшін сауат ашу сабақтары, спорттық сайыстар, медициналық сауаттылыққа бағытталған танымдық сабақтар өткізілді. Әсіресе Балаларды қорғау күніне орай ұйымдастырылған «Балмұздақ party» балалардың ерекше қызығушылығын тудырып, мерекелік көңіл-күй сыйлады.

Түскі астан кейін қатысушылар диско алаңына жиналып, көңілді әуен ырғағымен би билеп, өз өнерлерін көрсетті. Балалардың жүзіндегі қуаныш пен шаттық жазғы алаң жұмысының басты нәтижесі болды.

«ЭТНО Kids» жазғы алаңы тек ойын-сауық ортасы ғана емес, сонымен қатар балалардың достық қарым-қатынасын нығайтып, жаңа ортаға бейімделуіне, бос уақытын мазмұнды өткізуіне мүмкіндік беретін шығармашылық алаң болып табылады.

Алдағы күндері оқушылар үшін кинотеатрға бару, саябақта серуендеу және түрлі танымдық-мәдени іс-шаралар ұйымдастыру жоспарлануда. Бұл балалардың жазғы демалысын қызықты әрі пайдалы өткізуіне ықпал етеді.

Жаздың алғашқы күнімен басталған «ЭТНО Kids» жазғы алаңының жұмысы балаларға жаңа достар, жарқын естеліктер және көтеріңкі көңіл-күй сыйлайтыны сөзсіз.

Жазғы алаң жетекшісі: Елшибекова Гулзат Есетовна