Батыс Қазақстан облысы

Ә.Молдағұлова атындағы №38 мектеп-лицейінің кітапханашысы Шаукарова Гулсим Кумаргалиевна

«Кітап оқуды қолдаймыз!» акциясы

Ә.Молдағұлова атындағы №38 мектеп-лицейінде «Кітап – ақыл-ой маржаны» атты «Кітап оқуды қолдаймыз!» акциясы өтті.

« Кітап – білім бұлағы», «Кітап – оқығандікі, білім – тоқығандікі», «Күш білімде, білім кітапта» деген мақал-мәтелдерді әр қазақ баласы күн сайын ата-анасынан, мұғалімдерінен естіп отырады. Бірақ, әр үйдің төрінде ғаламторға қосылған компьютері бар заманда кітап оқитын баланы кездестіру қиын-ақ. Оқушыларды кітап оқуға қызықтыру, кітаптың пайдасы мен маңызы туралы мағлұмат беру мақсатында мектебімізде 5-10 сынып оқушыларының қатысуымен өткен акцияда М.Әуезовтің “Абай жолы ” кітабын бір-біріне жалғап, осы ұлы шығармаға қолдау көрсетті. 10 -сынып оқушылары , сынып жетекшісімен бірігіп еріктілер тобы дәуірнаманы сыныптан-сыныпқа табыстай келе 8«б» сынып оқушылары мектеп кітапханашысына кітапты табыстады. Мектеп кітапханашысы қабылдап алған соң кітап арқылы адамзаттың ақыл-ой маржанының бойға жинайтынын айтып, кітап оқудың пайдасы туралы сыр шертті. Қазақ тілі мен әдебиеті пәнінің мұғалімі Гүлжихан Үмбетқызы әл-Фараби бабамыздың өлең шумақтарын мысалға келтіре отырып, балалардың кітап оқу арқылы қандай ойлы азамат болатындығын түсіндіріп өтті. «Кітап –біздің досымыз! Бәріміз оқимыз! Әрқашан оқимыз! Кез келген жерде оқимыз! Мен оқимын! Біз оқимыз!

Барлығымыз оқимыз!» деп ұрандатқан оқушылар өз үндеулерімен ортаға шығып, еріктілер тобының жетекшілігімен әр сынып оқушылары флешмоб арқылы өз өнерлерін көрсетті. Шараға қатысушылар «Кітап оқу сізге не береді?», «Қазіргі кезде қандай кітап оқып жатырсыз?» деген сұрақтарға жауап беріп, бір-бірімен пікір алмасты. Арнайы шақырылған қонағымыз, Х.Есенжанов атындағы балалар кітапханасының меңгерушісі Ақмарал Кеңесқызы өзінің пікірімен бөлісті. Мектеп мұғалімдері, оқушылар, барлық кітапсүйер оқырман қатысқан бұл акцияның соңы бір кісідей жұмылып, флешмоб билеумен аяқталды. Құнды пікірлер айтылып, бір-бірінің ойымен келіскен оқушылар бұл шарадан көп мәлімет алып, ерекше әсермен тарасты.