KMF: Халыққа жақын банк

? Автор: Есіркеп Айдана Серікқызы,

М. Әуезов атындағы Оңтүстік Қазақстан университеті,

Журналистика мамандығының 2-курс студенті

Ғылыми жетекші: Жамашева Ж.

Аннотация:

KMF – Қазақстандағы ең ірі микрофинанстық ұйымдардың бірі. 2024 жылы ол ресми түрде банк мәртебесін алып, еліміздің 23-ші банкіне айналды. Бұл мақалада автор ұйымның қалыптасу тарихы, әлеуметтік миссиясы мен халыққа көрсетіп отырған қолдауын саралайды.Қазақстанның қаржы жүйесінде соңғы айларда айтулы жаңалық болды. Елдегі ең ірі микрофинанстық ұйымдардың бірі – KMF ресми түрде банк мәртебесін алып, Қазақстандағы 23-ші банкке айналды. Бір қарағанда, бұл жай ғана статистика секілді көрінуі мүмкін. Алайда шын мәнінде, бұл оқиға – еліміздің қаржы тарихындағы маңызды бетбұрыс сәт.

KMF-тің қалыптасу жолы оңай болған жоқ. 1997 жылы ACDI/VOCA халықаралық ұйымының қолдауымен құрылған бұл шағын құрылым алғашында ауыл тұрғындары мен кәсіпкерлерге аз мөлшерде несие берумен ғана айналысты. Уақыт өте келе ұйым халық сеніміне ие болып, бүгінде миллиондаған клиенті бар, еліміздегі ең ірі микрофинанстық құрылымға айналды.KMF-тің басты ерекшелігі – ауыл халқына жақындығы. Көптеген ірі банктер шалғай елді мекендерге назар аудармайды, ал KMF, керісінше, ауыл аймақтарын негізгі клиенттік базасына айналдырды. Қарапайым шаруалар мен шағын кәсіп иелері осы ұйым арқылы өз кәсібін дамытып, табысын арттырды. Мыңдаған адам қаржылық тәуелсіздікке қол жеткізді.KMF-ке деген халықаралық сенім де жоғары. Еуропалық қайта құру және даму банкі (EBRD), Халықаралық қаржы корпорациясы (IFC), Азия даму банкі және басқа да ұйымдар оған миллиондаған доллар көлемінде инвестиция салды. Ал БҰҰ Даму бағдарламасы (UNDP) мен UN Women ұйымдары KMF-ті әйел кәсіпкерлерді қолдаушы сенімді серіктес деп бағалады. Бұл оның әлеуметтік жауапкершілікті терең сезінетінін айғақтайды.Әсіресе, әйелдер мен жастарды қолдау – KMF қызметінің басты бағытының бірі. Ауылдағы әйелдерге берілген микронесиелердің арқасында тігін цехтары ашылып, азық-түлік дүкендері мен қолөнер шеберханалары пайда болды. Жастар да өз стартаптарын жүзеге асырып, жаңа жұмыс орындарын ашуда. Осылайша, KMF тек қаржы беріп қана қоймай, армандардың орындалуына жол ашып отыр.Соңғы жылдары ұйым жасыл экономикаға ерекше көңіл бөле бастады. Күн панельдерін орнату, энергия үнемдейтін жабдықтар мен экологиялық өндірістерді дамыту – осының бәрі KMF несиелерінің арқасында мүмкін болды. Бұл – экологиялық тұрақтылық пен табиғатқа жауапты көзқарастың нақты көрінісі.

Сонымен қатар, цифрландыру да ұйым қызметін айтарлықтай жеңілдетті. Енді ауыл тұрғындары смартфон арқылы несие рәсімдеп, төлем жасай алады. Бұл – қаржылық қолжетімділікті арттырудың нақты үлгісі.KMF-тің банкке айналуы – еліміздің қаржы нарығына жаңа серпін береді. Енді ол тек несие берумен шектелмей, депозит қабылдап, төлем карталарын шығарып, халықаралық төлем жүйелеріне қосыла алады. Бірақ ең бастысы – ол өз ұстанымы, яғни “халыққа жақын болу” қағидасынан айнымайды.Менің ойымша, KMF – жай ғана банк емес. Ол – халыққа тірек, кәсіпкерге серіктес, қоғамға қамқор ұйым. Оның тарихы – қарапайым ауыл тұрғынынан бастап, еліміздің экономикасына үлес қосып отырған ірі қаржы институтына айналған табыс хикаясы. Осындай ұйымдар көбейсе, Қазақстанның да болашағы жарқын болары сөзсіз.