Алматы облысы, Қарасай ауданы,

"Жамбыл атындағы орта мектеп" КММ

Дене шынықтыру мұғалімі

Токсабанова Назым

«Фитнес мектеп қабырғасында: дене шынықтырудың жаңашыл форматы»

Қазіргі білім беру жүйесінде оқушылардың денсаулығын сақтау, физикалық белсенділікті арттыру және салауатты өмір салтын қалыптастыру маңызды мәселе болып отыр. Дәстүрлі дене шынықтыру сабақтары көбіне стандартты жаттығуларға негізделіп, оқушылардың қызығушылығы мен қатысу белсенділігін толық қамтамасыз ете алмайды. Осы орайда мектеп тәжірибесінде фитнес элементтерін сабаққа енгізу сабақтың мазмұнын жаңартып, оқушылардың физикалық дамуына айтарлықтай ықпал етеді.

Фитнес элементтерін сабақ барысында пайдалану оқушылардың қимыл-қозғалыс белсенділігін арттыруға, денсаулығын нығайтуға, дене дайындығын дамытуға және салауатты өмір салтына қызығушылығын қалыптастыруға мүмкіндік береді. Қазіргі мектептерде гиподинамия, қозғалыс белсенділігінің төмендігі және цифрлық тәуелділік сияқты проблемалар кең таралған. Ұсынылған әдістемелік құрал жас ерекшеліктерін ескере отырып, сабақтарды тиімді және қауіпсіз форматта ұйымдастыруға бағытталған.

Дене тәрбиесі теориясы, педагогика, психология және жас ерекшелік физиологиясы салаларындағы ғылыми тұжырымдарға сүйеніп әзірленген. Сабақ құрылымы логикалық жүйеленіп, жаттығулар біртіндеп, жүйелі түрде берілген. Жеке және топтық жұмыстар арқылы оқушылардың белсенділігін арттыру, қауіпсіздік пен жас ерекшелігін сақтау қағидалары енгізілген. Саралап оқыту элементтері оқушылардың физикалық дайындығы мен мүмкіндіктеріне сай сабақ жүргізуге мүмкіндік береді. Дәстүрлі дене шынықтыру сабақтарына аэробика, стрейчинг, функционалдық және ырғақты жаттығулар енгізілген. Сабақ динамикалық, интерактивті форматта жүргізіліп, оқушылардың ынтымақтастық қабілетін, жауапкершілігін және пәнге қызығушылығын арттырады. Ұсынылған тәсілдер білім беру мазмұнын жаңартып, оқу процесін заманауи форматқа бейімдейді.

Мектеп тәжірибесінде тиімді қолдануға арналған: сабақ үлгілері, жаттығу кешендері және бағалау құралдары ұсынылған. Оны факультативтік сабақтарда, қосымша спорттық курстарда немесе мектепішілік жобаларда қолдануға болады. Апробация нәтижелері фитнес элементтерін қолдану оқушылардың физикалық көрсеткіштерінің жақсарғанын, денсаулығының нығайғанын және сабаққа қатысу белсенділігінің артқанын көрсетті. Фитнес технологияларын сабаққа енгізу оқушылардың дене дамуын кешенді түрде жетілдіруге, салауатты өмір салтына қызығушылық қалыптастыруға, сабаққа қатысу белсенділігін арттыруға мүмкіндік береді. «Фитнес мектеп қабырғасында: дене шынықтырудың жаңашыл форматы» әдістемелік құралы ғылыми негізделген, практикалық мәні бар және мектептегі дене шынықтыру сабақтарының сапасын арттыруға бағытталған тиімді педагогикалық өнім болып табылады.