Орман – табиғаттың сыйы!

Ол тек тамақ пен шикізат көзі, біздің планетамыздың «өкпесі» ғана емес. Орман – адамдарға емдік әсер ететін, күші мен қайратын қалпына келтіретін, өсімдіктер мен жануарлар дүниесінің әртүрлігінен эстетикалық ләззат алуға мүмкіндік беретін денсаулық қоймасы.

Жасыл желек арасында қаланың, ауылдың қапырығы мен шаңы, мазаны алар шуы жоқ кеудені керіп дем алуға болады. Гүл мен шөптің жұпар исін жұтып, құстардың сайраған дауысын тыңдап табиғаттың сұлулығына тамсанамыз. Орманда өрт қауіпсіздігін сақтамау салдарынан осы кереметтің бәрі әп-сәтте өртпен аяусыз жойылады. «От – орманның қатыгез жауы»

Ол оған орны толмас және мағынасыз зиян келтіреді. Өртпен орман өсімдіктері ғана емес, көптеген құстардың ұялары, жас және ересек жануарлар, терісі бағалы аңдар мен құстардың азық қоры, ормандағы құрылыстар, дайындалған сүректер және жануарлардың азығы, ағаш көпірлер және басқа халық шаруашылығы объектілері жойылады. Орман өрттері негізінен адамдардың кінәсінен туындайды. Ол орманда жұмыс істейтін және демалатын туристердің, жидек және саңырауқұлақ терушілердің, балық аулаушылар мен аңшылардың отқа ұқыпсыз қарауының нәтижесінде болады. Өрт қауіпі бар маусымға дайындалу мақсатында орман шаруашылығы мемлекеттік мекемелері орман өрттері туындай қалған жағдайда олармен күресу үшін күштер мен құралдардың өзара іс-қимыл іс-шараларының жоспарын әзірлейді, шекаралас жатқан барлық заңды тұлғалардың және шаруа қожалықтары бірлесіп жұмыс жасайды. Осы кезде небір жағдайларға төтеп беріп , өртпен күресетін орман күзетшілері аянбай еңбек етіп, бақылау жүргізеді.

«Көкшетау» МҰТП РММ Шалқар филиалы

Шалқар орманшылығы

орман шебері Ысқақов А Қ