Жетісу облысы,Ақсу ауданы

«Мамания орта мектебі,мектепке дейінгі шағын

орталығымен»КММ

Қазақ тілі мен әдебиеті пәнінің

мұғалімі,педагог-зерттеуші

Султангалиева Ж.Т.

«Мәтінмен жұмыс арқылы функционалдық сауаттылықты

дамыту»

Функционалдық сауаттылық – қазіргі білім беру жүйесінде ерекше маңызға ие ұғым. Бұл бағдарлама – білім алушылардың мәтінмен жұмыс істеу дағдыларын дамыта отырып, олардың білімді өмірде қолдану қабілетін арттыруды көздейді. Қоғамдық-гуманитарлық салада функционалдық сауаттылықты дамыту – оқушылардың тұлғалық қалыптасуына, сыни ойлауына және тілдік құзіреттілігінің артуына ықпал етеді. Осы тұрғыдан алғанда, курс бағдарламасының өзектілігі жоғары.

Бағдарламада заманауи педагогикалық тәсілдер – сын тұрғысынан ойлау технологиялары, белсенді оқыту әдістері (жобалау, пікірталас, коллаборативті тапсырмалар) тиімді қамтылған. Сонымен қатар, оқушы мен мұғалімнің өзара әрекеттестік моделін жетілдіруге бағытталған тәсілдер де қолданыс тапқан.

Курс мазмұны дәстүрлі тіл үйрету тәсілінен бөлек, оқушылардың логикалық, шығармашылық ойлауына, мәтінді түсініп, оны қайта өңдеуіне негізделген. Мәтінмен жұмыс тек оқу материалын түсіндірудің құралы емес, оқушының өмірлік және когнитивтік дағдыларын дамытудың тетігі ретінде қарастырылған. Бұл — бағдарламаның басты жаңалығы.

Бағдарлама мазмұны мен құрылымы ғылыми-педагогикалық негіздемелерге сүйене отырып жасалған. Функционалдық сауаттылық, мәтінмен жұмыс, тілдік дағды ұғымдарына қатысты ғылыми әдебиеттер мен зерттеулер негізге алынған. Курстың мақсаттары мен күтілетін нәтижелері білім беру теорияларымен сәйкестендірілген.

Бағдарламаның құрылымында жүйелілік, мақсат-міндеттер мен мазмұн арасындағы байланыс нақты көрініс тапқан. Әр бөлімнің бір-бірімен сабақтастығы, әдістемелік қисыны сақталған. Оқу мақсаттары мен бағалау критерийлері де әдістемелік негіздерге сай келеді.

Бағдарлама нәтижелерін бағалауда нақты дәлелдер ұсынылған. Апробация барысында алынған деректер мен талдаулар нәтижесінде оқушылардың оқу сауаттылығы мен танымдық белсенділігінің артқаны көрсетілген. Бұл – жұмыстың дәйектілігін дәлелдейтін маңызды көрсеткіш.

Курс мектеп мұғалімдерінің іс-тәжірибесінде тікелей қолдануға лайықталған. Қарапайым әрі тиімді тапсырмалар, нақты әдістемелік ұсыныстар арқылы әртүрлі деңгейдегі оқушылармен жұмыс істеуге мүмкіндік береді. Бұл бағдарлама жалпы білім беру мазмұнын толықтыратын құнды ресурс бола алады.

Бұл авторлық бағдарлама Жетісу облысы, Ақсу ауданы, Абай атындағы орта мектебі, мектепке дейінгі шағын орталығымен» коммуналдық мемлекеттік мекемесінде апробациядан өткізілді. Авторлық бағдарламаға қосымша ретінде оқушы дәптері ұсынылған. Бағдарлама оқушылардың жас ерекшелігіне сай құрастырылған.

Курс бағдарламасы ғылыми-әдістемелік құжаттарға тән рәсімдеу талаптарына толықтай сәйкес келеді. Мазмұны түсінікті, құрылымы жүйелі. Ескертпе ретінде айтар болсақ, болашақта курстың цифрлық-нұсқасын әзірлеу, мультимедиялық тапсырмалармен толықтыру ұсынылады.

Курс бағдарламасы – теория мен практиканы ұштастыра білген, оқу сапасын арттыруға бағытталған тиімді педагогикалық өнім. Оны өзге сыныптарға бейімдеп кеңінен қолдануға болады. Сонымен қатар, бұл бағдарламаның негізінде әдістемелік құрал немесе оқулық дайындау жұмыстары қолға алынуы орынды.