Мұқағалиға арнау

Мұқағалиға арнау

Армысыз ақын аға, Сізге қолыма қалам алып, өз замандастарының атынан шын жүректен ақтарылып арнау жазып отырмын. Сіз көрген биік-биік заңғар таулар, өркеш-өркеш жоталар, сайын дала бәрі орнында. Саржайлауыңыз да, Шалкөдеңіз де, Сіз туған Қарасаз да баяғы қалпында. Өзіңіз айтқандай «Бәрі өтуде... жаңаруда дүние, ескіруде» дегендей, Сіз көрген ғасыр жылжып өтіп, жаңа ғасыр келді. Қазақ елі жаңа кезеңге өтті, өзінше тәуелсіз ел болғалы 29 жылдан асып барады. Сіздің өлеңдеріңізді оқыған кезде мыңдаған адамның жүрегі толқиды, сол мыңдаған адамның қатарында мен де бармын. Өлеңдеріңізді сүйсіне оқыған кезде, менің жүрегімде өмірге деген құлшыныс артып және патриоттық сезімдер оянады. Олай дейтінім, Сіз туған өлкеде мен де тудым. Осы өлкенің тамылжыған табиғатын сүйем.

Қазір жастардың бәрі білімге ден қойған, заман ағымына қарай икемделіп талпыну үстінде. Сіздің өлеңдеріңізді мектептерде 1-сыныптан бастап 11-сыныпқа дейін қазақ әдебиеті оқулығынан оқиды. Оқушылар өлеңдеріңізді құмарлана оқиды. Түрлі кештерде де сіздің өлеңдеріңізге жазылған әндер шырқалады. Біз Сізді ылғи ортамызда жүргендей сезінеміз. Өзіңіз жазған мына өлеңде: « Бәріңе, бәріңе құмармын, осылай мәңгілік тұрармын, өлмеймін, сірә де өлмейтін шығармын!» – деп дұрыс айтқансыз, сіз өз ұрпағыңызбен мәңгі біргесіз. Сіздің әдебиетке қосқан үлесіңіз шексіз. Сізге қазір халық Хантәңірінің мұзбалақ ақыны, өмірді жырлаудағы философ ақын деп баға беріп қойған. Тәуелсіздігімізді алғаннан кейін қалаларда, ауылдарда Сіздің атыңыз көшелерге есім ретінде берілді. Алматы қаласындағы бұрынғы Пастер көшесі қазір Мұқағали Мақатаев атында және сол көшенің Желтоқсан көшесімен қиылысатын жеріндегі саябақта Сіздің мүсініңіз ескерткіш ретінде орнатылды. Ал өзіңіздің тұрған Қарасаз ауылында Сізге арнап мұражай ашылды. Еліміздің барлық жерінде «Мұқағали оқулары» өтіп тұрады. Сіздің жырларыңыздың жинағы әр қазақтың төрінен орын алған.