МЕКТЕПКЕ МЫҢЖАСАР МАҢҒЫТАЕВ ЕСІМІ БЕРІЛДІ

Жетісай ауданының адами әлеуетті дамыту бөліміне қарасты «№43 «Қызыл таң» жалпы орта мектебі» коммуналдық мемлекеттік мекемесіне еліміздің кемеңгер тұлғасы, Қазақстанның халық әртісі, Мемлекеттік сыйлықтың лауреаты, атақты композитор, професор Мыңжасар Маңғытаев есімі берілді.

Бұл есім Ш. Ділдабеков ауыл әкімшілігіне қарасты Сұлубұлақ ауылында орналасқан мектепке кездейсоқ таңдалмады. Әндерін бүкіл ел-жұрт орындайтын Мыңжасар Маңғытаев – бала кезінен ел аузына іліккен, әндерін бүкіл ел-жұрт болып сүйіп орындайтын кәсіби деңгейі өте жоғары композитор еді. Оның әндерін Роза Бағланова, Бибігүл Төлегенова, Ермек Серкебаев сияқты танымал әншілеріміз орындап, сахнаға шығарған. Сонымен қатар классикалық дүниелерге де барып, көптеген симфония, опералар дүниеге әкелді. Оның еңбектері опера және балет театрында талай рет қойылып, елдің құрметіне бөленді, халықтың рухани қажетін өтеді. Мыңжасар өзі қазақы психологиядағы, қазақ тұрмысын, мәдениетін өте жақсы білетін композитор. Өз ұлтының өнерін, мәдениетін, руханиятын жүрегімен, жанымен түсінген жан – осы Мырзашөл өңірінің тумасы.

Тұла бойы тұнған өнерді дамытып, халықтық әуеннен нәр алған белгілі композитор айналасына шуақ шашып, кішіге қамқор бола білген білгір де білімді композитор сұңғыла шежіре Мыңжасар Маңғытаев алтын уақыттың бір минутын да бос жібермей, бойындағы асыл қасиетті келер ұрпаққа аманат ету ісін мүлтіксіз орындап, үнемі жұмыс үстінде шыныққан төл өнеріміздің өкілі. Біз енді ол кісінің жақсы істерін, шығармашылығын айтып, еске алатын боламыз. Осындай көрнекті композитордың еліне сіңірген еңбегі еш уақытта ұмытылмайды деп ойлаймын.