Қайырымдылық-адамгершілік белгісі

Қайырымдылық - адамгершілік белгісі

Адам өміріндегі ең игі істерінің бірі – мұқтаж жандарға қамқорлық жасау. Адамдар бір — біріне қайырымдылық, мейірімділік таныту арқылы жақсылық жасайды. Қамқорлықты қажет ететін жандарға қол ұшын беру арқылы адам баласы жақсылыққа қадам бастайды. «Қайырымдылық - адамгершілік белгісі» атты ұранмен Тұғыл ауылындағы Т.Рысқұлов атындағы орта мектебінде 1-наурыздан бастап «Жүректен жүрекке» қайырымдылық акциясы өтіп жатыр. Акция аясында мектеп бойынша «Жүректен жүрекке» акциясын өткізу туралы жоспар жасалынды. Осы уақыт аралығында аз қамтылған отбасынан шыққан оқушыларға мектебіміздегі ұстаздар мен ата-аналар тарапынан демеушілер іздестіріліп, материалдық көмек көрсету жағы қолға алынды.

Аталмыш акцияның мақсаты – әлеуметтік көмек алуға құқығы бар аз қамтылған, көпбалалы, тұрмысы қолайсыз отбасылардың балаларына, жетім балалар мен ата-анасының қамқорлығынсыз қалған балаларға және басқа санаттағы балаларға әлеуметтік көмек көрсету, оқумен қамтылмай қалған мектеп жасындағы балаларды анықтау және есепке алу. 

«Жылуы жоқ үйден без, қайырымы жоқ биден без»,- дегендей қайырымдылық, адамгершілікті биік ұстап, кісілікті ту етіп, жылы лебізін аямай, қолдан келген жәрдемін ұсынып, достық пейілдерін таныта алатын жандардың арамызда әлі де бар екендігі қуантады. Олай болса, мектебіміздегі әлеуметтік жағдайы төмен оқушыларға көмек көрсеткен жандарға мектеп ұжымы атынан үлкен ризашылығымызды білдіре отырып, әлі де осындай игі істерге атсалысып, көмек қолын созатын адамдар саны артып, жалғасын табады деген сенімдеміз...

Тұғыл ауылы

Т.Рысқұлов атындағы орта мектебі

А.Жанымхановна