Қазақ әдебиеті сабағында білім сапасын көтеру мақсатында тапсырмаларды орындату жолдары

Мектеп қабырғасындағы оқушы-еліміздің ертеңгі тұтқасын ұстар басты тұлға. Сондықтан оларды білімді, парасатты, мәдениетті де кішіпейіл, рухани жан-дүниесі бай жеке тұлға етіп қалыптастыру-әрбір ұстаздың басты міндеті. Осы міндетті шешуде күнделікті сабақтың алар орны ерекше. Өйткені, сапалы сабақ-білімді, табысты оқушы қалыптастырудың басты кепілі.

Ұлтымыздың ұлы ұстазы А.Байтұрсынұлы: «Елді түзетуді бала оқыту ісін түзетуден бастау керек»,-деген екен. Мен де бұл пікірмен толық келісемін. Неге? Өйткені, мемлекет болашағы болып саналатын жас ұрпаққа білім мен тәрбие беруден өткір мәселе жоқ. Ал бұл орайда тиімді тапсырмалар негізінде білім беру өзекті мәселелердің бірі болып отыр. Бұл мәселені қалай шешеміз? Тиімді тапсырмаларды әдебиет сабағында қалай жоспарлаймыз?-деген әрбір пән мұғалімінің көкейінде тұрған сауал екендігі даусыз.

Әдебиет пәні-мектеп бағдарламасындағы жетекші пәндердің бірі. Өйткені ол жас ұрпаққа этикалық және эстетикалық тәрбие беруге бағытталған. Әдебиет пәні оқушылардың қызығып оқитындығымен ерекшеленеді. Сонымен қатар бұл сабақта оқушылардың тұлғалық ерекшеліктері дамып, өмірге көзқарастары қалыптасады. Сондықтан тапсырмаларды баланың қызығушылығын оятатындай етіп жоспарлаған дұрыс. Сондай-ақ әдебиет сабағында оқушылардың қызығушылығын оятып қана қоймай олардың бойына ұлттық құндылықтарымызды да дамытуға міндеттіміз. Себебі қазақ әдебиеті пәнінің халықтың тәрбие-дәстүрлерін, әдет-ғұрыптары мен ұлттық болмысын бойға сіңіруде орны ерекше. Сонымен қатар қазақ әдебиеті пәнінен оқушы қол жеткізуге тиісті оқу мақсаттарының көпшілігі ұлттық құндылықтарға негізделген.

Оқу мақсаттарын негізге ала отырып тақырып бойынша эссе жаздыру, сыни мақала жаздыру, өз көзқарастарын дәлелдеуге бағытталған пікірталастар мен дөңгелек үстелдер ұйымдастыруға болады. Әрбір тақырыпты өткенде оқушыларға ұлтымыздың салт-дәстүрі мен мәдениетінен, ділінен хабардар етіп отыру-ұлттық құндылықтарға тәрбиелеу негізі. Мен өз тәжірибемде әрбір сабағымда ұлт мәдениетін бойға сіңіретін ұлттық ойындар және әр түрлі танымдық іс-әрекеттер арқылы тапсырмалар орындатамын. Мысалы, «Алтын сақа», «Көкпар» ойыны арқылы оқушылар арасында сұрақ-жауаптар ұйымдастырамын.

Сонымен, мектеп мұғалімдерінің алдында тұрған басты міндет-оқуды қызықты ету. Оқу қызықты болғанда ғана оқушылардың сабаққа ынтасы артады. Себебі, білім жақсы игеріледі. Ал бұл өз кезегінде оқушылардың білім сапасының артуына ықпал етеді. Оқушылардың шығармашылық дағдылары дамиды. Ұлттық құндылықтардан алыстамайды. Ендеше, оқушылардың бойында ұлттық құндылықтарды қалыптастыру үшін ерінбей-талмай жұмыс істеуіміз қажет.