Өнерге өмірін арнаған ұстаз: Меңдіғани Тілектесұлы

Хореография – сезім мен қимылдың үндескен өнері. Осы өнердің қыр-сырын меңгерген, мыңдаған шәкірт тәрбиелеп, ұлттық би мәдениетіне зор үлес қосқан тұлғалардың бірі – Меңдіғани Тілектесұлы. Ол тек талантты хореограф емес, сонымен қатар, өзінің білім-білігімен, тәжірибесімен жас ұрпаққа өнеге бола білген ұстаз. Біз Меңдіғани ағаймен сұхбаттасып, оның шығармашылық жолы мен шәкірттеріне деген көзқарасы жайлы әңгімелестік.

Өнерге апарар жол

– Меңдіғани аға, би өнеріне қызығушылығыңыз қалай басталды?

– Өнер менің өмірімде ерте бастан өз орнын тапты. Кішкентайымнан ән мен биге жақын болдым. Отбасымызда ұлттық дәстүрлерді құрметтеуге көп мән беретінбіз. Әкем домбыра тартса, анам әдемі ән айтатын. Сол орта менің өнерге деген құштарлығымды оятты. Ал хореографияға ерекше қызығушылығым мектеп қабырғасында басталды. Мектептегі үйірмелерге қатысып жүріп, ұлттық билерді үйрендім. Кейін Алматы хореографиялық училищесіне түстім. Бұл оқу орны менің кәсіби өмірімнің негізін қалады.

Ұстаздық жолдың бастамасы

– Шәкірт тәрбиелеу жолыңыз қай уақытта басталды?

– Мен өзім кәсіби хореограф ретінде біраз уақыт өнер ұжымдарында қызмет еттім. Алайда, шығармашылықпен қатар, білім беру де мен үшін маңызды болды. Сондықтан университетте хореография пәнінен сабақ бере бастадым. Бұл жолда ұстаздық – үлкен жауапкершілік пен адалдықты талап етеді. Әр шәкіртке тек бидің техникасын үйретіп қана қоймай, оның өнерге деген сүйіспеншілігін арттыру керек.

Ұлттық бидің мәні мен маңызы

– Сіз үшін ұлттық бидің маңызы қандай?

–
Ұлттық би – халқымыздың тарихы мен мәдениетінің айнасы. Әр қимыл, әр ырғақ халықтың өмір сүру салты мен дәстүрін бейнелейді. Біздің міндетіміз – осы құндылықтарды сақтап қана қоймай, оны жаңғырту. Мен шәкірттеріме ұлттық биді үйреткенде оның философиясын түсіндіруге ерекше мән беремін. Би – тек дененің қозғалысы емес, бұл – рухани тәжірибе.

Шәкірт тәрбиелеу – ең үлкен жетістік

– Шәкірттеріңіздің жетістіктері сіз үшін қаншалықты маңызды?

– Шәкірт жетістігі – ұстаз еңбегінің жемісі. Мен үшін шәкірттерімнің әрқайсысының жеңісі – үлкен мақтаныш. Олар еліміздегі және шетелдегі байқауларда жүлделі орындарға ие болғанда, өзімді ең бақытты адам сезінемін. Мысалы, Ақжан Талғат – менің мақтан тұтар шәкірттерімнің бірі. Оның еңбекқорлығы мен өнерге деген адалдығы болашақта биік белестерге жетелейтініне сенімдімін.

Шәкіртінің көзімен: Ақжан Талғат

Меңдіғани Тілектесұлының шәкірті Ақжан Талғат – қазіргі таңда, жетістіктерге жете білген, , «Би сұлтан» ансамблінің мүшесі. Ол ұстазына деген алғысы мен құрметін бізбен бөлісті.

– Ақжан, Меңдіғани ағайдың сіздің өміріңіздегі орны қандай?

– Меңдіғани ағай – мен үшін ұстаз ғана емес, үлкен өмірлік бағыттаушы тұлға. Оның әр сабағы – жаңа білімнің, рухани азықтың бастауы. Ол тек биді үйретіп қана қоймай, әр қимылды түсініп орындауға, би арқылы өзіңді білдіруге баулиды. Мен оның жанкешті еңбегіне, шәкірттеріне деген мейірімділігіне тәнтімін.

– Ұстаз ретінде қандай қасиеттерін ерекше атап айтар едіңіз?

– Меңдіғани ағайдың басты ерекшелігі – оның еңбекқорлығы мен шыдамдылығы. Ол бізге әрқашан сенім артып, жаңа белестерге жетуге ынталандырады. Оның адамгершілігі мен сабырлылығы бізді әрдайым алға жетелейді. Ұстазымның арқасында мен би өнерінің терең мағынасын түсініп, өзімді осы салада таба алдым.

Ұстазға алғыс

-Меңдіғани Тілектесұлы – тек хореограф емес, өнерге өмірін арнаған жан. Оның шәкірттерінің жүрегінде қалдырған ізі мәңгі сақталады. Би өнері арқылы тәрбиеленген саналы ұрпақ оның еңбегінің шынайы жемісі болса керек. Ұстазымыздың бойындағы еңбекқорлық, ізгілік, шыдамдылық пен шығармашылық ізденіс әр шәкіртіне үлкен үлгі. Ол бізді тек бидің техникасын үйретіп қана қоймай, өнерге деген шынайы сүйіспеншілікті жүрегімізге ұялатты. Ол әр шәкіртінің бойынан таланттың ұшқынын көріп, оны жарқырата білетін шебер педагог. Оның әдістемесі, ұстаздық тәсілдері әрдайым ерекше. Ағай әрқашан шәкірттерін қолдап, жігерлендіріп, қиын сәттерде демеу болып, жетістіктерде бірге қуана біледі.

Өмірдегі ең үлкен жетістіктердің бірі – шәкірт тәрбиелеу. Ал Меңдіғани ағай бұл жетістікті толығымен бағындырған тұлға. Ол тек өнер әлемінде емес, әр шәкіртінің өмірінде де өз қолтаңбасын қалдырды. Біз оның тәлім-тәрбиесін тек би әлемінде ғана емес, өмірдің әр саласында сезінеміз. Әрбір үйреткен қимылы, айтқан сөзі, берген кеңесі – біздің болашаққа деген сенімімізді арттырады,- деп ұстазының еңбегіне ризашылығын жеткізді.

Сұхбаттасқан: Аружан Барлыбай

4 курс студенті