Шығармашылық ізденіс

Үздік жас маман 2018

Қараша айының 24 жұлдызы күні №20 орта мектепте жас ұрпаққа саналы тәрбие мен сапалы білім беруді көздеп, ұстаздық атты ұлы жолды таңдап келген жалынды жас мамандар арасында «Үздік жас маман 2018» байқауы өткізілді.Ұстаздардың шығармашылық ізденістерін арттырып, тәжірибе алмасуын дамыту мақсатында болып өткен бұл байқау талабы биік жас мамандарды жан-жақты тануға мүмкіндік берді. Алғашқы кезеңнен-ақ сайыскерлер өздерін жүрекжарды өлеңімен өрнектелген қысқа метражды бейнесюжет арқылы таныстырып көрермендерін таң қалдырды. Ал,өнер көрсету кезеңінде қатысушыларымыз ән шырқау, көркемсөз оқу, драмалық қойылым бойынша барын салып бақты. «Болмасаң да, ұқсап бақ» деп дана Абай атамыз айтқандай жас ұстаздарымыздың талабына мектеп ұжымы да риза болысты. Жас мамандардың шығармашылық ізденістерін көрсетіп, жүрек қалауымен таңдап келген кәсіптерінің қасиетін аша түсетін байқаудың үшінші бөлімінде химия пәнінің мұғалімі Қошан Гүлдана жарқ етіп көзге түсті. Мақсат етіп талпынған адам ешқашан махрұм қалмайды емес пе? Нәтижесінде, байқау қорытындысы бойынша Қошан Г.Қ бас жүлдені жеңіп алды.Сайыскерлердің білімін де, білігін де назарға алып, төрелік еткен әділқазылар қатысушыларға дипломдар мен

естелік сыйлықтар табыс етті.

Мұғалім мәртебесін көтеріп, жас мамандарды қолдап, олардың мамандықтарына деген қызығушылықтарын арттыруда осындай байқаулардың маңызы зор. Қалдыбике Мадиярқызы басқарып отырған білім ошағында жан-жақты, өз істерінің білгірі болуға талпынатын ұстаздар көп.Мәңгілік елдің болашағы, өскелең ұрпақты білім-ғылым арқылы өркендеуге жетелеп, ең бір сара жолда жүрген әріптестеріме сан қырынан танылып, биіктерден көріне берулерін тілеймін.

Рыстаулетова Халима №20 мектеп мұғалімі