Тәрбие тал бесіктен

Андақұлова Назгүл

Қызылорда облысы

Жаңақорған ауданы

№229 жалпы орта мектептің мұғалімі

Тәрбие тал бесіктен...

«Ата-ананың қадірін білмеген-халық қадірін білмес,»-деп зергер жазушы Ғ.Мүсірепов айтқандай,әрбір адам өзін жарық дүниеге әкелген, мәпелеп өсірген ата-анасына мәңгілік қарыздар. Өз ата-анасын қадірлесе,ертең өзі де қадірлі болмақ.

Асыл анам бен асқар таудай әкемнің берген тәрбиесі- мен үшін мәңгілік мұра. Анамыз отбасында әкеміздің рөлін жоғары қоя біледі.Әкеміз-отбасымыздың басшысы,асыраушысы, қамқоршы-тірегі. Әкеміздің айтқан әр сөзі, істеген іс-әрекеті ұл-қыздары, біздер үшін үлкен өнеге мектебі.

Ал анамыз біздер үшін отбасының беріктігін сақтай білген,ер-азаматын ерекше сыйлай білген, ұл-қыздарына рухани қолдау көрсете білетін отбасы ұйытқысы. Анамнан алған тәрбием, ақ сүтімен бірге дарыған мінез-құлқым өміріме азық бола білді. Мен де өз балаларыма ата-анамнан көрген тәрбиемді бойларына сіңіргім келеді.

Бала тәрбиелеу ісі-өте жауапты іс. Ол тек сенің ғана балаң емес, ол-елдің азаматы, Қазақстанның бір бөлшегі. Сондықтан бала тәрбиесіне әрбір ата-ана немқұрайлы қарамау қажет.

«Балаға берілетін бірінші тәрбие ата-анасын, туған-туысын, жолдасын сыйлауға үйретуден басталады. Себебі ата-анасын сыйламаған бала жолдасына да, қоғамға да пайда келтірмейді,»-деп ұлы педагог Ыбырай Алтынсарин керемет ой түйген. Осы ғажайып пәлсапаны барлық ата-ана өз ұстанымына айналдырса нұр үстіне нұр болар еді.