Тәрбиеші – болу бір бақыт.

Мен балабақшада тәрбиеші болып жұмыс істегеніме еш өкінбеймін. Тәрбиеші – ол балаға бағыт-бағдар, тәлім тәрбие беретін отбасынан кейінгі екінші анасы. Тәрбиешілер - ішкі жан-дүниесі бала жандар. Мен үшін балалармен жұмыс жасау – үлкен бақыт. Себебі тек қана бала ешнәрсеге алаңдамай мейірімділікке сенеді, кішкентай алақандарын менің алақаныма қойып өз құпияларын айтып маған сенім білдіреді. Пәк көңілді балалармен қарым-қатынас маған қуаныш, шаттық сыйлайды. Осы жолда жақсы нәтижеге жету үшін тәрбиешілердің негізгі серіктері – ізденіс, талапшылдық және шығармашылық.

Балабақшадан балалардың алатын тәрбиесі көп деп ойлаймын. Әр баланың мінезі әр түрлі болып келеді.. Бірі жылдам болса, бірі баяу, бір бала өз-өзімен отырғанды жақсы көреді. «Адамды тәрбиелеу демек оның екінші қуанышқа ие болатын келешек жолын тәрбиелеу»деп А.С.Макаренко айтып кеткендей бізде балаларға бір нәрсе болсын үйрете алсақ, ол бізге және ата-анаға үлкен қуаныш сыйлайды. Біз балаларымыздың болашағына жауапты жандармыз. Балабақшадан балалардың алатын тәрбиесі өте көп. Бұл жолда үлкен ізденіс, парасат қажет. Ендеше тәрбиеші әр күнді үлкен ізденіспен өткізуі керек деп ойлаймын. «Тәрбиеші – бағбан, бала –гүл» деген қағида әр тәрбиешінің ұстаздық ұстанымы.Осы қағиданы ата-ана мен тәрбиеші бірігіп пайдалансақ,балабақша бала үшін ең сүйікті мекенге айналар еді.

«Ұстаздық еткен жалықпас, үйретуден балаға» деп ұлы Абай атамыз айтқандай, менің де осы мамандық иесі атанғаныма жеті жыл болыпты. Шын жүректен қалаған мамандығың әр кезде де жақсы жетістікке апарары сөзсіз. Ал тәрбиеші болу – айтуға оңай болғанмен, қиыны мен қызығын қатар алып жүретін , елдің ертеңгі болашақ азаматтарын тәрбиелейтін тәрбиелі адам болу. Бүлдіршіндеріміз балабақшаға бар ынтасымен, қуанышты көңілімен келсе, мақсатымыздың орындалғаны деп есептеймін. Өзімді бақытты ұстаз, бақытты тәрбиешімін деп сезінемін. Өз мамандығымызды сүйе білейік!

ШҚО б/б Катонқарағай ауданы

білім бөлімінің «Айгөлек»

бөбекжайының тәрбиешісі

Базилова Арайлым Болатжановна.