«Тілге құрмет – елге құрмет»

Мемлекет басшысы Қасым-Жомарт Кемелұлы Тоқаев Қазақстан Еліне жасаған алғашқы жолдауында «Қазақ тілі ұлтаралық қатынас тілі болуы тиіс» деп ерекше атап өткеніндей, Қазақстан жерінде тағдыр тәлкегімен өмір сүріп жатқан барлық ұлт өкілдері мемлекеттік тіл – қазақ тілін жетік білуі, құрметуі тиіс. Қазақ халқының ғасырлар бойы аңсаған ұлы арманы тәуелсіздігіне қол жеткізу жолында қазақ халқы өз тарихын, мәдениетін, ана тілін сақтау үшін жанын аямады. Қазақ поэзиясының мұзбалағы Мұқағали Мақатаев: «Тарихымды жазудамын бүгін мен, Бабаларым, сенің ана тіліңмен» деп айтқанындай, қазақ халқы дүние шежіресіне өз тарихын ана тілімен жазуға қол жеткізді. Сондықтан, қазақ тілі жалпы Қазақстан халықтары үшін ортақ және қасиетті ұғым!

Өзім ұйғыр ұлтының өкілі ретінде қазақ тілін ерекше бағалаймын. Мектепте өз ана тілімде білім алдым. Одан кейін Абай атындағы Қазақ Педагогикалық университетінде «Қазақ тілі мен әдебиеті пәні мұғалімі» мамандығын алып шығып, бүгін ұшқан ұям Қайрат ауылы Исмаил Саттаров атындағы орта мектебінде қызмет атқарып келемін. Шығармашылық жолымда қазақ жас ақындарының шығармашылығын ұйғыр тіліне аударып, газет-журнал беттерінде, «Жүрек альбомы» кітабымда жарияладым. Қазақ тіліне аударылған өлеңдерім республикалық «Қазақ әдебиеті» газетінде, «Жұлдыз» журналында берілді. «Қарадала тынысы» газетінде қазақ тілінде жазған өлеңім, жаңартылған білім мазмұны жайында мақалаларым аудандық жинақтарда, «Жетісу» газетінде орын алды.

«Тілге құрмет – елге құрмет» демекші, сөзімді «Тілегім» атты өлеңімнің бір шумағымен түйіндегім келеді:

Сөйле тілім,

Өзің менің тірегім.

Жырлайыншы Елімді - жүрегім.

Қаны барда,

Жаны барда

Қолдар сені ұйғыр ұлың,

Биік болсын тұғырың,

Осы болсын саған айтар тілегім!

Абдулжан АЗНАБАКИЕВ.

«И.Саттаров атындағы орта мектебі»

коммуналдық мемлекеттік мекемесі

директорының тәрбие ісі жөніндегі орынбасары.

Қайрат ауылы.