Үлкен үміт арттырған шәкірт!

Арыстандай айбатты,

Жолбарыстай қайратты,

Қырандай күшті қанатты,

Мен жастарға сенемін!

М.Жұмабаев

Иә, бұл өлең жолдары - бойында қаны тулаған қазақ жастарына деген үлкен үмітпен жазылған арнау. Сөзімді бұл өлең жолдарымен бастаған себебім, бүгінгі мен таныстырғалы отырған мектебіміздің ғана емес, отбасының, бір облыстың мақтанышына айналған , жас та болса көптегени белестерді бағындыра білген -

Сәмбет Саят Төреханұлы.

Ол 2011 жылдың 9 шілдесінде жарық дүние есігін ашқан. Қазіргі таңда

А. Рудаки атындағы №23 ЖББМ 7 А сынып оқушысы. Мінезі салмақты, артық сөзбен шаруасы жоқ жас жеткіншек мектепте өз ұстаздарына да , достарына да сыйлы.

Оның бала кезден спортқа деген ерекше ықыласы көзге түсіп, бокстан спорт үйірмесіне қадам басады. Бұл бағытты таңдап келген оның, қазіргі деңейге жетуіне біршама уақыт кетті. Ақырындап темірдей тәртіп пен үздіксіз жаттығулардың арқасында, алғашқы жүлделі орындарын ала бастады. Оның спортқа деген сүйіспеншілігі, әр жекпе-жекке шыққандағы өзіне сенім артқан адамдардың алдындағы жауапкершілігі ерекше сүйсіндіреді.

Солардың бірнешеуін айта кетсек «9-Мамыр Жеңіс күні» мерекесіне орай Ұлы отан соғысының ардагері, Социалистік еңбек ері Шаблан Ділдабековты еске алуға арналған сайыста өз салмағы – 32 кг категорияда жүлделі I - орын, бокстан кіші жасөспірімдер және балғын балалар арасында Алматы облысы, Қарасай аудандық ашық біріншілігінде I - орын, Өзбекстан елінде өткен жасөспірімдер арасындағы ашық біріншілікте жүлделі I - орын иеленді. Сонымен қатар 2023 жылдың Жетісай ауданы ‘Үздік боксшы”, 2024 жылы ‘Үздік боксшы’’ атағына ие болды.

Шәкіртіміз мұнымен тоқтап қалған емес. Саяттың атасы, сол ауылдың құрметті азаматы, ауыл ақсақалы Дүйсенбиев Сәмбет - немересін мақтан тұтады. Бар болғаны 13 жасар жігіттің осыншама спортқа деген қызығушылығы, бағындырып жатқан белестері көз қуантарлық. Атасының әр жарыс алдындағы немересіне берген ақ батасы оған үлкен қолдау мен өзіне деген сенімділік сыйлайды.

Бүгінгі таңда А. Рудаки мектебінің мақтанышына айналып отырған шәкіртіміз сабағында өз деңейінде оқиды. Ұстаздары оның үлкенге құрмет көрсете алатынын, әлсізге қорған бола алатынын ерекше ризашылықпен айтып отырады. Достарының алдында өзін олармен теңдей ұстап, өз қатарына үлгі болып отырған жайы бар. Мектебімізде бұл баланы танымайтын, ауылда оның жеңістеріне сүйсінбейтін жан кемде-кем.

Бүгінде жас боксшының тілекшісі болып отырмыз. Қаршадай жас жеткіншек қазіргі таңда өз мектебінің, ауылдың, тегінің атын шығарса, келешекте дүние жүзіне елінің атын шығаратын, әлемге әйгілі боксшы болады деп сенеміз. Арманы асқақ, мақсаты биік шәкіртімізге спорт жолында жеңістер тілейміз!

А.Рудаки атындағы №23 ЖББМ-нің директоры Қ.Кузбакаров