«Ұлттық құндылықтар арқылы оқушылардың рухани жан дүниесін байыту».

«Ұлттық құндылықтар арқылы оқушылардың рухани жан дүниесін байыту».

Тәуелсіздік алған еліміздің келешек ұрпақты ұлттық, халықтық және этностық-мәдени тұрғыда тәрбиелеуі бүгінгі күннің өзекті мәселесі. Мұндағы алға қойылып отырған негізгі талаптар – Қазақстан білім беру жүйесінің бүкіләлемдік білім беру кеңістігіне толық енуінің алғашқы ұлттық даму стратегиясын жасап, моделін құру.

Бұл талаптардың жүзеге асырылу бағытындағы жұмысты үздіксіз білім берудің алғашқы сатыларының бірі – мектеп оқушыларының білімге деген құштарлығын арттыру, ұлтымызға тән қасиеттерді бойларына сіңіру.

Ұлттық сана-сезімді балалардың бойына ұялата білудің жолдары көп, соның ішіндегі ең бастысы, туған-тұрған жерінің қадір-қасиетін, табиғат сырын терең ұғынып, болашақты жалғастыратын ұрпақ екендігін сезініп өсуі, өз өлкесінің суын, нуын қастерлей білуі, ұғынуы.

Мектепке қойылатын аса маңызды талап - балалардың этностық-мәдени сәйкестілігін қалыптастырып, білімдерін жинақтау мен жүйелеу, олардың айналадағы құбылыстар туралы негізгі түсініктері мен қарапайым ұғымдарын қалыптастыру; баланың ана тілі, ата тегі, төл мәденеті мен тарихы, туған жері, салт-дәстүрлері, ұлттық рәміздер туралы, сонымен қатар жеті атасы, өз жұрты мен нағашылары, туыс атаулары туралы білім беру.

Оқушыларды ұлттық құндылықтар арқылы тәрбиелеудің маңызды факторы - тіл. Өзара ана тілінде сөйлейтін балалар этникалық тілін сақтай алады. Бабаларымыздың қара сөзінің құдыретін жас ұрпаққа үйрету арқылы олардың сөз қорын байытып, ана тілінің мәртебесін көтеру қажет.

Адамның ана тіліне деген сүйіспеншілігі бала кезінен басталады. Балаларға ана тілін үйрету әр ата-ананың, әр ұстаздың борышы.

Тәлім-тәрбие берудің басты саласының бірі - ұлтжандылық, халқы үшін адал қызмет ету. Ол үшін ежелгі қазақ ақын-жыраулары, ойшылдарының шығармаларымен таныстыру, оқушыларды елжандылық рухта тәрбиелеуге баса көңіл бөлу.

Президент Н.Ә.Назарбаев өзінің «Қазақстан - 2050» Жолдауында: «...оқушыларды қазақстандық патриотизм мен шығармашылық жағынан дамыған жеке тұлға ретінде тәрбиелеу аса қажет... бүгіннен бастап ұлттық мінез-құлық, биік талғампаздық, тектілік, білімділік, ұлттық намыс қасиеттерін сіңіріп қалыптастыруымыз керек», - деген болатын. Елбасының бұл сөздері біздер үшін негізгі бағыт, бағдарлама болып табылады.

Ахметбекова Самал Ниязбекқызы

Қамысты ауданы, Алтынсарин ОМ, бастауыш сынып мұғалімі