Work and Travel: студентке берілетін өмірлік тәжірибе

Қазіргі таңда жастар үшін шетелде жұмыс істеп, жаңа ортада тәжірибе жинау - арман емес, нақты мүмкіндік. Сол мүмкіндіктің бірі - Work and Travel бағдарламасы. Бұл бағдарлама арқылы мыңдаған студент әлемді көріп қана қоймай, өздігінен шешім қабылдауды, еңбек етуді және жауапкершілікті үйренеді. Осы жолды таңдағандардың бірі - Жасур Расулов. Жасур Расулов 2005 жылы Түркістан қаласында дүниеге келген. Бүгінде ол Америка Құрама Штаттарында Work and Travel бағдарламасы арқылы жұмыс істеп жүр. Оның айтуынша, бұл бағдарлама студент өміріндегі ең пайдалы тәжірибелердің бірі. Work and Travel - АҚШ үкіметі қолдайтын жазғы мәдени алмасу бағдарламасы. Бағдарламаның негізгі мақсаты - студенттерге америкалық мәдениетпен танысуға, жаз мезгілінде заңды түрде жұмыс істеуге және өз елдеріне жаңа тәжірибемен оралуға мүмкіндік беру.

Бағдарламаға бакалавр және магистратурада оқитын студенттер қатыса алады. Студент күндізгі бөлімде оқуы керек және оқуын жалғастыру ниеті болуы шарт. Бұл талаптар бағдарламаның басты ережелерінің бірі болып саналады.

Work and Travel бағдарламасына қатысу үшін ағылшын тілін жетік білу міндетті емес. Ең бастысы - қарапайым деңгейде сөйлесе алу. Дегенмен, тіл білімі жоғары болған сайын жұмыс табу, жаңа адамдармен танысу және күнделікті өмірде қиындықсыз бейімделу әлдеқайда жеңілдейді.

Көп студент визалық сұхбаттан қорқады. Алайда Жасурдың тәжірибесі бұл қорқыныштың негізсіз екенін көрсетеді. Оның сұхбаты небәрі 20 секундқа созылған. Ал досының сұхбаты ұзақ болғанымен, нәтижесінде екеуі де виза алған. Бұл жерде маңыздысы - өз мақсатыңды анық айтып, сенімді жауап беру.

Бағдарлама аясында студенттер көбіне сервис саласында жұмыс істейді. Мейрамхана, кафе, қонақүй, дүкен, ойын-сауық орталықтары - ең кең таралған жұмыс орындары. Жасур қоғамдық орындарда еңбек етуді дұрыс деп санайды. Себебі бұл орта адамдармен көп сөйлесуге, ағылшын тілін жетілдіруге және мәдени айырмашылықтарды түсінуге мүмкіндік береді.

Тұратын орын кейде жұмыс беруші тарапынан ұсынылады, кейде студент өзі іздейді. Алғашында қиын көрінгенімен, Америкада студенттерге арналған баспана табу аса күрделі емес. Әсіресе, бір қалада бірге барған студенттер бірігіп пәтер жалдауды жиі таңдайды.

Work and Travel бағдарламасы өзін - өзі ақтайтын жоба деп айтуға болады. Жалақы жұмыс түріне және штатқа байланысты өзгереді. Көп студент жұмыс істеп жүріп, бағдарламалық шығындарын жауып қана қоймай, саяхатқа және жеке қажеттіліктеріне де қаржы жинай алады.

Жұмыс маусымы аяқталған соң студенттерге АҚШ ішінде саяхаттауға уақыт беріледі. Жасур бұл кезеңді ең әсерлі сәттердің бірі деп сипаттайды. Достарымен бірге әртүрлі штаттарды аралап, елдің мәдениеті мен өмір салтын жақынырақ таныған.

Жасурдың айтуынша, Work and Travel оған тек жұмыс тәжірибесін емес, өмірге деген көзқарасты өзгерткен. Тәуелсіз болу, уақытты бағалау, әртүрлі ұлт өкілдерімен тіл табысу - осының барлығы болашаққа үлкен дайындық.

Work and Travel - жай ғана жазғы жұмыс емес. Бұл - студенттің өз-өзін тануына, әлемге басқа қырынан қарауына мүмкіндік беретін ерекше бағдарлама. Жасур Расуловтың тәжірибесі көрсеткендей, мұндай мүмкіндік әр жасқа үлкен серпін береді. Сондықтан студенттік шақта тәуекел етіп, жаңа жолды көруден қорықпау керек.