« ҚазҰУ- QS WUR халықаралық әлем университеттері рейтингінде 150- орында »

Әл - Фараби атындағы Қазақ ұлттық университеті әлем университеттері рейтингісі барысында QS WUR халықаралық университет Топ-200 ішінде 25 позицияға көтеріліп, 175 позицияда бой көрсеткен болатын. Аталмыш университет QS WUR халықаралық рейтингіде тағы да жоғары нәтижелерге қол жеткізіп, өз атын асқақтата түсті. Қазіргі таңда Әл - Фараби атындағы Қазақ ұлттық университеті QS WUR халықаралық рейтингіде 150 орынға көтерілді www.kaznu Бұл дегеніміз университетіміздің қарқынды жұмыс істеп келе жатқандығының белгісі. Осылайша, әл-Фараби атындағы ҚазҰУ Қазақстанның жоғары оқу орындары арасында ғана емес, бүкіл Орталық Азия мен ТМД елдерінде өзінің көшбасшылық ұстанымын тағы да дәлелдеді. ҚазҰУ-дың елеулі прогреске қол жеткізуі әлемдік деңгейдегі зерттеу университетіне айналуының нәтижесі, сондай-ақ басшылықтың, оқытушылардың, ғалымдар мен білім алушылардың серпінді жұмысының нәтижесі. Бұл біздің университетіміздің халықаралық аренада жоғары бәсекеге қабілетті екенін аңғарады. 2022 жылғы 8 маусымда QS WUR рейтингіне әлемнің түпкір түпкірінен 2462 жоғары оқу орындары қатысқаны белгілі, осы іріктеуден тек қана 1422-ге жуық ең мықты университеттер таңдалды. Quacquarelli Symonds World University Rankings (QS WUR) жаһандық рейтингінің нәтижелері анықталып, ең мықты университеттердің тізімінде көш бастап тұрған қасиетті қара шаңырағымыз Әл - Фараби атындағы Қазақ ұлттық университетін көру бір бақыт. Әл-Фараби атындағы Қазақ ұлттық университетіне QS рейтингтік сертификатын тапсыру рәсімі университет кітапханасында жалғасын тапты, ҚазҰУ басқарма төрағасы-ректоры Жансейіт Түймебаевқа ТМД және Орталық Азия елдеріне арналған QS рейтингтік агенттігінің өңірлік директоры Сергей Кристолюбов марапатты табыс етті. Сергей Кристолюбов ҚазҰУ-дың соңғы жылдардағы жетістіктерін атап өтіп, QS жаһандық рейтингіндегі талаптарға тоқталды. “Биыл әл-Фараби атындағы Қазақ ұлттық университеті көптеген талаптар бойынша өз көрсеткіштерін айтарлықтай жақсартты. Халықаралық рейтингте 150-ші орынға ие болу-бұл керемет көрсеткіш және жетістік. Мен ҚазҰУ оқытушылар құрамына, ғалымдарға және бүкіл командаға үлкен үлес қосқаны үшін алғыс айтқым келеді” -деп университетіміздің болашақта әлі талай биік шыңдарды бағындыратынын тілге тиек етті. Міне ендігі жерде QS WUR халықаралық рейтингісі барысында 150 орыннан 100 орынды қанжығалауды да мақсат ету керек.

Әл-Фараби атындағы Қазақ ұлттық университетінің аға оқытушылары: Саткенова Ж.Б., Исаева Н.Т., Нусупбаева С.А.