Атамекендегі алғашқы күзім

Атамекендегі алғашқы күзім

Сәлеметсіздер ме!

Мен, Даулетбек Каусар Дәулетбекқызы, Моңғолия мемлекетінен боламын. Атамекеніме – Тәуелсіз Қазақстаныма – ана тілімде, қазақ тілінде білім алсам деп келдім. Арман болған ата жұртымды аңсап көрсем деп, ата жұрттың төсінде аунап-қунап, туған халқыма деген сағынышымды бассам деп келдім. Моңғолиядан ата-бабаларымыздың мекеніне, тарихи отаныма арманымды орындасам деп, ата қонысымызға орнықсам деп келдім. Туған халқыма қызмет етсем, жоғары білім алып, атамекенімнің туған Отанымның дамуына үлес қоссам деп келдім. Моңғолияда моңғол мектебінде оқыған мен үшін қазақстандық жоғары оқу орнына таңдаған мамандығым бойынша оқуға түсу үшін әуелі қазақ тілін меңгеру қажет. Қазіргі уақытта Қазақстанның ең таңдаулы білім ордасы – әл-Фараби атындағы Қазақ ұлттық университетінің Жоғары оқу орнына дейінгі дайындық кафедрасында (www.kaznu.kz сайтынан ақпаратты толығырақ біле аласыздар) оқып жүрмін, себебі Қазақстан мемлекетінің стандартына сәйкес жалпы орта білімді бағдарламасын қарқынды түрде ана тілімде меңгеруге мүмкіндік береді. Біздің дайындық курсында оқу күздің екінші айында, 1 қазанда, басталды. Бұл күз мен үшін үлкен арманыма жол ашқан берекелі күз болды, алған әсерім де мол.

Сіздерге ата-мекендегі алғашқы күзім мен одан алған әсерім туралы қысқаша әңгімелеп бергім келеді.

Менің атамекендегі алғашқы күзім расымен ерекше басталды. Өз мекенім, өз жерім бәрі ерекше. Себебі атамекендегі алғашқы күзде өмір деген көз қарасым ашылып әлемді тани бастадым.Тіпті Қараша айы аяқталып, желтоқсан жақындап қалсада әлі Қыркүйек айы сияқты. Самал желімен, жаңадан сарғайып түсіп жатқан жапырақтар сондай бір керемет. айналаңда, тіпті аяқ астында әлдебір құпияны айтып жатқандай сыбдырлайды сары жапырақтар. Біздің факультеттің жанында шағын бақ бар. Бақтағы кейбір ағаштардың жапырақтары сап-сары түске боялса, енді басқа біреулері қызылсары түске енген. Айнала алтын жалатқандай, сондай әсем. Барлығынан ерекше әсер аласың. Атамекендегі алғашқы күз ғана емес, ерекше болған жаңа университет, жаңа ағай, қамқоршы апайлар. Ақылды, білімді достар барлығы ерекше деп мақтан тұта айта алар едім. Осы күз мезгілінде 25 Қазанда Республика күні болды. Күні кеше ғана біздің курстастар өз өнерлерін көрсетіп байқауға қатысты. Бұның өзі атамекендегі алғашқы күздегі алғашқы күздегі ерекше естелік деп айтар едім. Алла қаласа осы атамекенде талай биік шыңдарды бағындырып, жетістіктерге жетіп жақын жандарымыздың,ағай апайларымыздың үмітін ақтап, әлі талай атамекендегі алтын күзді қарсыаламын деген ойдамын.

Даулетбек Каусар,

әл-Фараби атындағы Қазақ ұлттық университеті ЖОО-ға дейінгі білім беру факультеті ЖОО-ға дейінгі дайындық кафедрасының 3-тобының тыңдаушысы,

жетекшісі: әл-Фараби атындағы Қазақ ұлттық университеті ЖОО-ға дейінгі білім беру факультеті ЖОО-ға дейінгі дайындық кафедрасының аға оқытушысы Наралиева Рахила Турсыновна