Дәріханада пациенттерге кеңес беру сапасын арттыру жолдары

Бүгінгі дәріхана – тек дәрі сатылатын орын емес, пациент пен денсаулық сақтау жүйесі арасындағы алғашқы байланыс нүктесі. Көп жағдайда пациент дәрігерге емес, ең алдымен фармацевке жүгінеді. Сондықтан дәріханада берілетін кеңестің сапасы емнің тиімділігіне, дәрілік қауіпсіздікке және пациенттің сеніміне тікелей әсер етеді. Ұшқыр ойлайтын, кәсіби әрі коммуникативтік қабілеті жоғары фармацев – сапалы фармацевтикалық қызметтің басты кепілі.

Пациентті «тыңдай білу» – сапалы кеңестің бастауы. Кеңес берудің сапасы дайын ақпараттан емес, дұрыс қойылған сұрақтан басталады. Фармацевт пациенттің шағымын мұқият тыңдап, симптомдардың ұзақтығын, ауырлық деңгейін, қосымша ауруларын анықтауы тиіс. Бұл қарапайым әңгіме емес, кәсіби сұхбат. Пациент өзін түсінгенін сезінген кезде ғана ұсынылған кеңесті қабылдауға дайын болады.

Қарапайым тіл – тиімді коммуникацияның кілті. Медициналық терминдер фармацевт үшін түсінікті болғанымен, пациент үшін күрделі болуы мүмкін. Сондықтан кеңес беру барысында ақпаратты қарапайым, нақты және қысқа жеткізу маңызды. «Қалай қабылдау керек?», «Қашан әсер етеді?», «Қандай жағдайда тоқтату қажет?» деген сұрақтарға анық жауап беру кеңестің сапасын арттырады.

Жекелендірілген кеңес – заманауи фармация талабы. Әр пациент – жеке жағдай. Жасы, өмір салты, созылмалы аурулары мен қабылдап жүрген дәрілері ескерілмей берілген кеңес сапалы бола алмайды. Ұшқыр ойлы фармацев стандартты нұсқаулықпен шектелмей, әр пациентке жекелендірілген ұсыныс береді. Бұл тәсіл пациенттің сенімін арттырып, дәріні дұрыс қолдануына ықпал етеді.

Клиникалық ойлау және кәсіби жауапкершілік. Пациентке кеңес беру кезінде фармацев тек препаратты ұсынумен шектелмеуі тиіс. Қауіпті симптомдар анықталған жағдайда дәрігерге жүгінуді ұсыну – кәсіби жауапкершіліктің көрінісі. Клиникалық ойлауы дамыған фармацев өзін-өзі емдеудің шекарасын нақты ажырата біледі.

Цифрлық технологиялар – кеңесті күшейтетін құрал. Электрондық анықтамалар, мобильді қосымшалар мен ақпараттық жүйелер фармацевке жедел әрі дәл ақпарат беруге көмектеседі. Алайда технология тек құрал екенін ұмытпау қажет. Негізгі әсер – фармацевтің білімі мен адамгершілік қарым-қатынасында.

Қорытындылай келе, дәріханада пациенттерге кеңес беру сапасын арттыру – кәсіби білім, ұшқыр ойлау және тиімді коммуникацияның үйлесімі. Пациентті тыңдай білетін, ақпаратты түсінікті жеткізетін және жауапкершілікпен шешім қабылдайтын фармацевт ғана шынайы сапалы қызмет көрсете алады. Мұндай кеңес дәріхананың беделін арттырып қана қоймай, халық денсаулығын нығайтуға нақты үлес қосады,-деп ойлаймын.