Студенттік өмір – жарқын болашақтың бастауы

Адам өмірінің қайсыбір кезеңі болмасын, өз алдына ерекше әрі қайталанбас болып келеді емес пе? Әрбір шақ бір-бірінен асып түсер, қиындығы мен қуанышы қатар жүрер, бір топ естеліктер жинағы іспеттес. Соның ішінде ең бір ыстық, жүрекке ерекше жылулық беретін өмір кітабының бір парағы- студенттік шақ болып табылады.

Мектепті жаңа ғана тәмәмдап, әлі де бойында ыстық суығы басылмаған, ата-анасымен ұстаздарына, еркелеп өскен, үйден жырақ шығып үйренбеген жас жеткіншектердің арман қуып, өмірдің ең үлкен бөлігіне аяқ басқан сәті. Бұл әрине студенттік шақ. Студенттік өмірдің қай кезеңі болмасын, адам санасында ерекше жаңғырып қалары сөзсіз. Дегенмен ең ысығы – 1ші курс ( жастардың тілінде, балмұздақ кез..). Мен үшінде ерекшесі осы. Ештеңеден хабарың жоқ, жан-жақтан келген жаңа достар, мүлде ерекше орта, өзгеше сабақтар,алғашқы махаббат, талабы көп ұстаздар, таныс емес аудитория, үнемі шатастыратын корпустар, бастапқыда жаттай алмай жүретін автобус бағыттары. Міне осылардың барлығы, әу бастағы студенттік кездің естен кетпес ыстық естеліктеріғой..

Осы бір жастықтың жалыны мен бойдағы ыстық қайрат бітесе қайнап тұрған сәтте, әрбір жеткіншек өз таңдауларына қарай өмір жолын тауып, лайықты жолына түсіп үлгереді. Студенттік кез дегенде ең бірінші еске түсетіні еркіндік емес пе? Әй дейтін-әже қой дейтін-қожа жоқтығын пайдаланып, желік қуып, клуб пен көше бойын жағалап, еркіндік деген осы екен деп жүріп, қай тобырдың арасынан шыққанын байқамай қалып, адасып жүргендер қанша ма. Өзім отырып кейде осындай қыз-жігіттерді ойлап, іштей қынжылып кететінім бар. Әйтсе де, алаулап, жанып, бойымызда ерік-жігер тасып тұрған кезде болшақты бағамдап,күш қайратын білім мен өнерге жұмсамаққа келген, масаты айқын, талабы таудай жастардың да көптігін жоққа шығармаймын. Студенттік шақ – үлкен мүмкіндіктер мен жарқын болашақтың бастамасы. Ол барлығана бірдей беріледі, бірақ оны кімнің қалай пайдаланары өзіне байланысты. Сол берілген мүмкіндікті өз орынымен пайдаланып, өмірдің ағысына қарсы жүзіп, өзіміздің лайықты әрі түзу жолымызды табу біздің басты мақсатымыз.

Сөзімді түйіндей келе айтарым, өмірде бір рет қана келетін бұл шақтың әрбір күні мен сағатын естен кетпестей қылып, қызыққа толы етіп өткізу әрбіріміздің өз қолымызда. Бастысы бағдардан адаспай, түзу жолда жүріп, бойдағы бар қабілеттерді шыңдап, бәріне үлгеріп жүріп, өмір атты кітабымыздың бір парағына айналған, студенттік шағымызды дұрыс тізгіндей алуымыз. Жылдар өте келе, студент атанған күннен бастап әрбір сәтті сағынышпен еске алар уақыт осы студенттік шақ болмақ. Студенттік өмір- ең соңғы кезеңі ерке шағымның!...

Мақала авторы: Сейсентай Мөлдір Советбекқызы

М.Х Дулати атындағы Тараз өңірлік университеті, «Ұстаз» институтының 2 курс білімгері ( логопедия мамандығы)