Оқу пәндерін өзін-өзі тану пәнімен интеграциялаудың маңызы

Оқу пәндерін өзін-өзі танумен интеграциялаудың маңызы

Кубашева Анар Утегеновна

Алматы қ., «Өзін-өзі тану» АҮД

гуманитарлық колледжінің

арнайы пәндер оқытушысы

В. Маяковский: «Ұстаз ізденгіш болуы, ойлай білуі, қандай істі болсын, бар ынтасымен атқара білуі керек»,-дейді. Соңғы әлемдік пандемиялық жағдайға байланысты қашықтықтан оқыту технологиясы мұғалімдердің білім беру сапасы мен оқушыларды тәрбиелеу жұмыстарына жауапкершілікті екі есе қажет етуде. Кез келген оқушы ең алдымен білімнен гөрі, ұстаздардан жылулық, сүйіспеншілік күтетіні ақиқат. Барлық ата-ана балаларының оқушылар арасында жақсы достық қарым-қатынаста, сыйластықта араласқандарын, балаларының білім мен адамгершілік қасиеттерді бойларына қатар сіңірген, тәрбиелі адам болғанын қалайды. Міне, сондықтан да оқу пәндерін жалпыадамзаттық құндылықтармен кіріктіретін, оқушылардың жүрегіне сүйіспеншілік нұрын құя алатын педагагог бүгінгі күннің нақты қажетті маманы. Осындай заман талабына сай оқу үдерісін өзін-өзі танумен интеграциялаудың қазіргі таңда үлкен маңызы бар.

Интеграция – педагогикалық тұтастықты қалыптастырып, білімді жүйелеу мен жинақтауда әр түрлі ғылымдарды біріктіру үшін қажет. Демек, мұғалімнің шеберлігі, әдіс-тәсілдері айқын көрінетін кезең десек те болады. Оқу пәндерін өзін-өзін танумен интеграциялаудың бірнеше себептері:

а) Баланың санасында теориялық материалмен қатар адамгершілік ілімі дамиды;

ә) Оқу пәнінің материалын адами қатынаста практикалық түрде қолдана алады;

б) Бала оқу материалдарына тек ғылыми тұрғыдан ғана емес, адамдық сезіну, ұғыну тарапынан мән беріп қарауға мүмкіндік алады.

Оқушылардың барлығы «Өзін-өзі тану» пәнін жақсы көреді. Себебі, олардың айтуынша ойларын еркін айта алады, психологиялық ахуалдар, қызықты әдіс-тәсілдер жетерлік, сабақ оңай, әрі қызықты өтеді, тіпті уақыттың жылдам өтіп кеткенін де аңғармай қалатындарын да жасырмайды. Міне, баланың ойын емін-еркін айтқызу үшін, пәнге деген қызығушылықтарын ояту үшін, жүректеріндегі махаббаты дамыту үшін, адамгершілік қасиеттерін шыңдау үшін, жалпы білім мен тәрбиені қатар ұстау мақсатында мен өз сабақтарымның көпшілігін «Өзін-өзі тану» пәнімен байланыстырамын.

Сара Алпысқызы: «Әр баланың қабілетін ашуы, өзіне жол табуы, өзінің күш-жігеріне сенуі өзінің өмірдегі орнын анықтау үшін өте маңызды! Әлемде махаббат пен мейірімділік аурасын жасай отырып, қарапайымдылық пен махаббат жүректен жүрекке жетуі тиіс»,-деп тұжырымдайды. Әрбір баланың, ата-ананың жүрегіне сүйіспеншілік нұрын ұялатуда әрқайсысымыздың орнымыз ерекше екенін ұмытпайық!