Ұлттық бірыңғай тестілеуге қалай дайындаламын ?

ҰБТ-да мектептің бағдарламасынан тыс тақырып болмайды , тек дайындалмаған оқушы болады . Мен , Айкөркем Бахтиярқызы – Түркістан облысы , Қазығұрт ауданы , мамандандырылған «Дарын » мектеп – интернатының 2022 жылғы үздік нәтиже көрсеткен түлектердің бірімін . Ұлттық бірыңғай тестілеудің маңызы мынада : талапкердің 11 жыл оқыған білімін тексеру арқылы жоғарғы оқу орнында тегін оқу мүмкіндігін беру .

Менен кеңес:

1.Сауатты дайындал.

1. Ең алдымен А нүктесін анықтап ал . А нүктесі – сенің қазыргі деңгейің . Сен оны арнайы пробный сайттардан немесе жаңартылған ҰТО кітапшаларынан біле аласың .

2. Екінші қадам : В нүктесін анықтау және мақсат қою . Мысалы , қазыргі деңгейің 102 балл болса , ал мақсатың 122 балл делік . Жалпы 20 балл қосу керек . 20 балды 5 пәнге бөл . Сонда , әр пәнге қанша балл қосу керектігін білетін боласың .

Толығырақ :

А нүктесі

В нүктесі

3. Жоспар құр .

• Қашан дайындалуың қажет ? Дәл қазір баста , кейінге шегеру жақсы нәтиже бермейді.

• Қалай дайындалу қажет ? Жеке немесе курспен дайындал . Таңдау өзіңде .

• Таңдау пәнің ауызша болса ,

• 7-11 сынып аралығындағы «Мектеп» және «Атамұра » баспаларының жаңартылған кітаптарын жинақта . Бір күнде неше тақырып оқу керектігіңді жоспарлап ал да, оқулықты түсініп оқуға кіріс . ҰБТ базасында логикалық сұрақтар басым болғандықтан . карталар мен схемаларды да назардан тыс қалдырма .

• База жатта

• Жүйелі қайтала .

• Таңдау пәнің есеп пәні болса

• Алдымен тақырыпты түсіну қажет . Тақырыпты өз бетімен түсіну екінің бірінің қолынан келмейді . Абзалы – маманға жүгіну .

• Тақырыпты түсінген соң көп есеп шығару керек .

• Ең бастысы : қатемен жұмыс жаса . шығара алмаған есептеріңе анализ жасамасаң , сенде прогресс болмайды .

1.4 .Немен дайындалу керек ? ҰБТ-да нақты келетін тақырыптармен дайындал , Ескі жүйе келмейді . Тек жаңа оқулықпен , ҰТО бекіткен нақты тақырыптармен дайындалған дұрыс . Келмейтін тақырыпты оқып уақыт жоғалтпа .

2. Кедергілерден арыл.

2.1. Ғаламтор. Әлеуметтік желілерден бас тарт . Сенің уақытың мен энергияңды ұрлайды . Өзіңді басқарып , саналы түрде шектеу қой . Сағат 15.00-20:00 аралығында желіге кірме . Телефонды сөндіріп дайындал . Тәулігіне 5 сағат дайындық үздік нәтижеге жеткізері сөзсіз.

2.2. Түсініксіз сөздер . Кітап оқу барысында ойымыз бөлініп кететін кездер болады . Оның себебі белгілі бір терминді немесе сөз тіркесін түсінбегеннен болады . Саған бейтаныс сөз кездессе дереу мұғалімнен сұра , сонда ғана қызығушылығың кетпей , білімің сапалы болмақ . Істі қашан емес , қалай аяқтағаның маңызды .

2.3. Қорқыныш . Айналадағы адамдардың « Қазақ әдебиетінің болашығы жоқ , кім боласың ?» , « Медицинаның балы жоғары , түсе алмайсың ғой » , «Ертең бәрібір жұмыс таба алмай , ауылға қайта келесің » сынды негативті сөздері сенің санаңды улайды . Ешқайсына құлақ аспа . Өз жолыңды біл . Арманыңа адал бол . Әрқашан ең қиын жолды таңда . Ол жақта конкуренттер аз . Қиналып жатырсың ба ? Демек , сен дұрыс жолдасың !

2.4. Психологиялық дайындық - ең басты факторлардың бірі . Сен қаншалықты жоғарғы дәрежеде дайындалсаң да миыңдағы өзіңе деген сенімсіздігің стресс туғызады . 9 ай дайындалған біліміңді 5 сағат тестте отырып ұмытып қалу қаупі басым . Сондықтан өзіңе сен , жай ғана үздіксіз дайындалсаң жемісін көресің . Артық уайым – қайғыға уақытыңды жоғалтпа .

3.Құлшыныс. « Адамның көңілі шын мейірленсе , білім-ғылымның өзі де адамға мейірленіп , тез қолға түседі . Шала мейір шала байқайды .»

Отыз екінші қара сөз.

4.Қызығушылық . Өз таңдаған пәніңді махаббатпен , қызыға оқы . Ешқашан болдым , толдым деме . Қалаған адам – амал табады , қаламаған – сылтау табады . Елімізде мүмкіндік өте көп . Мейлі , тіпті шалғай ауылдарда тұрсаң да , мектеп мұғалімдерінің біліміне қанағаттанбасаң да , еліміздегі ең озық ұстаздардан онлайн білім алып , жоғарғы нәтижеге қол жеткізе аласың . Интернет желісі нашар ауылда тұрып , онлайн курс арқылы жоғары нәтижеге жеткендердің бірі өзіммін .

5.Сенім . Тынымсыз оқы , еңбек ет , бірақ өзіңе тым қатты сенбе . «Барлығына мен өзім жеттім , басқа сыныптастарымнан мықты білемін , грантты мен алмағанды кім алады ?! » деуші болма . Әуелі Алланың қалауымен жеткеніңді ұмытпа . Біраз түлектің қателігі де осында : қаңтар ҰБТ-да жоғарғы нәтиже көреді де , босаңсып , шынайы ҰБТ-да -10, -15 балл регресс жасайды .

6, Бәсекеге қабілетті орта тап . Өзіңмен бірге жарысып оқитын орта тап . Айналаңа мықты қарсыластар жина . Дайындалу барысында босаңсуға бой алдырсаң , қатарыңнан қалып бара жатқаныңды сезінесің де , сенің ішкі мотивацияң оянады . Сені өсіретін де , өшіретін де - сенің ортаң .

7.Режим . Салауатты өмір салтын ұстан . 24/7 кітапқа немесе компьютерге телмірудің қажеті жоқ . Дайындыққа тәулігіне 5 сағат арнасаң жеткілікті . Уақытылы тамақтанып , уақытылы демал . Түнгі ұйқы кемінде 7 сағат болуы керек . Таза ауада серуендеуді де ұмытпа . Ми нейрондарына гемоглобин дұрыс бармағандықтан ақпарат қабылдау қабілеті төмендйді . Ал гемоглобинді өкпеміз тыныс алған кезде түзеді .

8.Бас тарт . Жиын – тойдан , сауық – сайраннан , қарым-қатынастан уақытша бас тарт . Бар фокусыңды дайындыққа бөл . Артық зат ойлама . Қатарластарыңнан қалу реніш туғызары анық . Алдымен қолыңа грант сертификатын ал , одан соң да барлығына үлгересің .

9.Доғар. Уақытыңды өзіңе қажетсіз пәндерге арнауды доғар . Ол саған грант бермейді . 9 – сыныпта оқушы негізгі білімді алып шығады . Ал 10-11 сыныпты дайындыққа арна . Мен де 2 жыл дайындалғанмын . 10-сыныпта онлайн оқығандықтан ҰБТ-ға дайындықты бастау қиынға соққан жоқ . Ал 11-сыныпта мұғаліммен ашық сөйлесу керек . Бейіндік пәндерің басқа екенін , күнделіті сабақты дәптерге түсіретініңді айтып , дайындыққа рұқсат сұра .

10 . Күшіңді соңына сақта . Мен жіберген қателік : 10- сыныптан бастап онлайн курспен дайндалдым . Әдебиет пен тарих пәнін қатар алдым . Екі ауызша пәнге де бірдей дайындалу қиынға соқты . Қала берді мектептің тапсырмалары тағы бар . Солай 10-сыныпты 3-4 сағат ұйқымен жүріп аяқтадым . 11-сыныптың тамыз айынан бастап 4 пәнді де қатар алдым . Алғашында қиынға соққан жоқ . Қыркүйек айында ешқандай мұғалім дайындыққа босатпасы анық . Сондықьан мектеп пен курс тапсырмаларын қатар орындауға тура келді . Солай , күнделікті емес , күнара ұйықтар жүрдім . 6 ай уақыттың қалай өткенін байқамай да қалдым . Қаңтар ҰБТ-дан 123 балл жинадым . Аудандағы ең үздік көрсеткіш . Наурыз ҰБТ-ның 70 %-ы жаңа бағдарламамен болатынан есітіп , түнгі 22:30-ға дейін интернат оқушыларымен бірге мектепте қалып сабақ оқыдым . 115 балл жинадым .

Соңғы 2 ай уақыт қалды . Ал менде түк те күш-жігер қалған жоқ . Барлық энергиямды таусытып , денсаулығымды құртып алдым . Еш ісіп өнбей , 1 айды ұйқымен өткіздім .Асылында , сол екі ай уақытты 8-10 сағатымды дайындыққа арнауым қажет болатын . Ең үлкен қателігім де осында . Бірінші мүмкіндіктен 123 балл жинап шықтым , шүкір . Кімнің қанша уақыт дайындалғаны емес , мәреге жақындағанда қалай әрекет еткені маңызды .

ҰБТ – қорқыныш , үрей емес .Ол – жай ғана тест . Мейлі , сен 10 жыл 3-4 бағаға оқысаң да . жоғарыда айтылған кеңестермен 9 айда кемі 100+ нәтижеге жете аласың . Ол үшін басқалардың ертең ойлайтынын сен бүгін жаса . Дәл қазір баста .

Мақала авторы : Айкөркем Бахтиярқызы